Die Nasionale Vereniging van Voertuigvervaardigers van Suid-Afrika (Naamsa) sê dié verkoopsyfer weerspieël die voortgesette druk op die nasionale voertuigmark. Van die 32 566 voertuie wat in Februarie nuwe eienaars gekry het, was 20 406 passasiersvoertuie, 10 118 ligte handelsvoertuie, 898 mediumswaar handelsvoertuie en 1 144 swaar vragmotors en busse.
Terselfdertyd het die uitvoer van voertuie uit Suid-Afrika na bestemmings in die buiteland met 27,5% afgeneem teenoor Februarie verlede jaar. Dr. Johan van Zyl, president en uitvoerende hoof van Toyota Suid-Afrika, reken die afname in voertuigverkope in Suid-Afrika stem nou feitlik ooreen met die globale neigings in die bedryf.
"Hoewel ons bank- en kredietstelsel tot dusver meer veerkrag getoon het as dié van die ontwikkelde ekonomieë van die wëreld, is ons duidelik nie immuun teen die impak van die ineenstorting van daardie ekonomieë nie." Volgens mnr. Brand Pretorius, voorsitter van McCarthy Motor Holdings, dui hierdie statistiek daarop dat die voertuigmark nog nie heeltemal sy laagtepunt bereik het nie omdat ongunstige verkoopsneigings steeds in die voorgrond is.
"Die belangrikste bydraende faktore vir hierdie uiterse lae verkope is al die segmente is eerstens die negatiewe makro-ekonomiese omgewing en tweedens 'n aantal verswarende plaaslike faktore. Dit sluit in onsekerheid in die opbou tot die algemene verkiesing, 'n krimpende ekonomie en lae sake- en verbruikersvertroue," sê Pretorius.
4 Maart 2009
