Die Ecorider-motorfiets is in Skotland ontwerp spesifiek om die strawwe hooglande baas te raak met die minimum skade aan die omgewing.
Die Ecorider word die afgelope twee jaar in Skotland vervaardig na vyf jaar se navorsing en ontwikkeling om 'n werkeselmotorfiets daar te stel vir Britse boere, bosbouers, natuurbewaarders, sekuriteitspersoneel en ook as 'n ontspanningsryding.
Die diesel- of biodieselweergawe het 'n Hatz-enjin wat 230 kubieke sentimeter verplaas en glo 42 kilometer met 'n liter diesel kan aflê. Vir die petrolweergawe word 'n Kohler-enjin gebruik wat 175 kubieke sentimeter
verplaas. Vir groter veelsydigheid kan die outomatiese ratkas in hoëstrek, laestrek (donkierat) óf in trurat gebruik word.
Volgens mnre. Bruce McLeod en Les Purdon, die manne agter Ecorider SA, is die Ecorider 'n oor-ontwerpte, robuuste ryding wat in 'n klas van sy eie tuishoort, só tussen 'n motorfiets, 'n vierwieler en 'n trekker.
Met die smal profiel en breë buitebande pas dit maklik tussen bome en bosse en skrik dit nie vir hindernisse, soos los sand en water nie. En danksy die lae swaartepunt kan dit veilig teen hellings gebruik word waar geen ander veelterreinvoertuig dit sal waag nie.
Met 'n maksimumsnelheid van 40 km/h is die Ecorider beslis nie ontwerp om aan versnelrenne deel te neem nie. Volgens die invoerders is die bougehalte bo verdenking en word die relatief eenvoudige ontwerp deur lae onderhoud en kostedoeltreffende diens gekenmerk.
En wat omgewingsvriendelikheid betref, laat die dieselweergawe 83 % minder koolsuurgas in die atmosfeer
vry as die gemiddelde vierwieler, terwyl die biodieselweergawe geen koolsuurgas vrylaat nie.
Met 'n druk van minder as 14 kPa in daardie breë buitebande vind minder grondkompaksie plaas as wat 'n mens se voetspoor veroorsaak.
Die nuweling het 'n ruim bagasierak wat ontwerp is om tot 30 kg te dra en dan is daar 'n subraam met 'n sleephak agter die agterwiel wat waens of werktuie soos spuitbalke van tot 250 kg kan baasraak.
Die Ecorider word binnekort in Suid-Afrika verwag en wanneer handelaars gevestig is, behoort die petrol-, diesel- en
biodieselmodelle onderskeidelik R42 950, R52 750 en R55 950 (BTWuitgesluit) te kos.
