Weiveld het die vermoë om self te herstel nadat dit versteur is, en dit laat veeboere toe om op lang termyn goeie en stabiele voer- en diereproduksie en wins te verkry. Verder bied veld ook weerstand teen verandering en sal oor ’n wye reeks bestuurstoestande volhoubaar en gesond bly.
In hierdie artikel word gekyk na die gereedskap wat tot veeboere se beskikking is om eerstens te keer dat die veld agteruitgaan en voorts om vernielde veld te herstel sodat die maksimum volhoubare wins per hektaar op lang termyn bewerkstellig kan word.
Veebelading verwys na die getal diere wat ’n veeboer op sy plaas aanhou. Byvoorbeeld, as die boer 100 diere op sy plaas van 1 000 ha aanhou, dan pas hy ’n veebelading van 1 dier per 10 ha op sy plaas toe.
