Die uurglas is besig om leeg te loop. Thoko Didiza, minister van landbou, grondhervorming en landelike ontwikkeling, sê die siekte het nou al op 56 plekke in Limpopo, KwaZulu-Natal, die Vrystaat, Noordwes en Gauteng uitgebreek.
In die sentrale provinsies, waar daar dekades lank nie ’n probleem was nie, gaan dit alles oor vee wat onwettig uit die beheerde gebied verskuif word. ’n Mens is geneig om altyd te dink dit is net beeste wat uit Limpopo se beheerde gebied gesmokkel word.
Dit blyk nou uit ’n onlangse inhegtenisneming in die Vhembe-omgewing dat ’n boksmous die siekte help versprei het. Manie wonder of die siekte nie nóg moeiliker gaan wees om hok te slaan wanneer dit deur kleinvee versprei word nie.
