Mnr. Christopher Havenga, die rasadviseur, sê sowat 550 tot 600 belangstellendes het die afgelope nasionale veiling in die Afridome op Parys bygewoon.
Hy sê sowat 250 gaste was ook by die genootskap se dinee die vorige aand.
“Die genootskap het sy mikpunt bereik deur hoë gemiddelde pryse te behaal en nie om rekordpryse na te jaag nie.”
Altesaam 97 beeste is aan 63 verkopers verkoop en altesaam R 9,649 miljoen is van die hand gesit. “Ons doel was nie om rekordpryse na te jaag nie, maar hoë gemiddeldes te behaal. Die veiling is ook nie deur bekende telers en kopers oorheers nie.
“Deon Stegmann, oud-Springbokflank (2010-’11), is een van die telers wat nog nie ’n eie produksieveiling aanbied nie, maar wat met sy eerste deelname aan die nasionale veiling hoë pryse behaal het.” Volgens Havenga het die gehalte van die diere die deurslag gegee.
Die duurste bul was Blixem (JH 16-45) van mnr. Johan Henning van Marones-Borane by Alma in die Waterberg, waarvoor mnr. Ridwaan Moola van Heilbron en Vereeniging R500 000 opgedok het. Volgens Henning spog dié bul met uitstekende nageslag en saadproduksie.
Die duurste koei en kalf was Doc 16-02 van mnr. Dawood Docrat van die Aseel-stoetery, ook van Vereeniging, wat vir R300 000 aan me. Yolandie Botha en mnr. Danie Velthuysen van Iminathi Ranch buite Mookgophong verkoop is. Iminathi het ook die hoogste prys vir die vers STE 19-004 (R320 000) van Stegmann se Steggies-stoetery by Cradock betaal. In 2021 het Botha en Velthuysen die bul BH16-76 Ronaldo vir R1 miljoen op die sewende produksieveiling van die Hurwitz-broers gekoop. Op dié veiling het hulle ook ’n rekordprys van R650 000 vir ’n koei (3-in-1), BH16-305 Kelly, dragtig en met haar kalf, betaal.
Die gemiddelde prys vir dragtige koeie op die nasionale veiling was R102 385 elk, 3-in-1-koeie R117 800, dragtige verse R101 703, bulle R148 357, koeie met kalwers R85 357, en semenstrooitjies R7 000 elk.
Die veiling is deur Vleissentraal en aanlyn deur Meerkat aangebied, en mnr. Johan van der Nest was die afslaer.
