“Ons sê altyd om te meet, is om te weet, maar deesdae glo ek om te meet, is net die begin van weet. Om te kan analiseer en interpreteer wat jy meet – dít is insig en dít maak beter bestuur in ’n boerdery moontlik. Daarsonder neem jy maar besluite op gevoel,” sê mnr. Zander Ernst van Allesbeste Boerdery van Tzaneen.
Dié boerdery is een van ’n paar wat die Qlik-sagtewareplatform gebruik om groter sin te maak van data en nut te ontsluit. Dit is veral die Sweeds ontwerpte Qlik-platform se vermoë om data uit talle bronne – van finansiële state tot spreiblaaie, elektroniese meettoerusting en sosialemediarekeninge – te ondervang en te interpreteer, wat dit ook vir boerderye en landboubesighede van waarde maak.
“Ons kan data gebruik in byna enige formaat waarin jy dit het, of dit ’n Excel-spreiblad, teksdokument of Facebook-rekening is. Ons kan daaraan koppel en statistieke en data daaraan onttrek,” verduidelik mnr. Jandré Killian van RIC Consulting, wat al sedert 2008 saam met kliënte werk om data te verwerk en insigte daarvan te onttrek.
