Bredell sê indien landelike munisipaliteite se bestuur in orde is, die leierskap stabiel is en daar bewys is dat daar by ’n begroting gehou kan word, sal dié munisipaliteite daarin slaag om beleggings van hierdie aard te lok. Hy voeg by dat sy departement bereid is om landelike munisipaliteite hiermee te help.
Sy departement help ook tans munisipaliteite om strategiese beplanning in verband met elektrisiteit te doen. Dit word gedoen met die samewerking van die departement van ekonomiese ontwikkeling en toerisme, wat tegniese steun aan munisipaliteite bied om die nodige raamwerke vir hernubare opwekkingskapasiteit en die koop van krag by privaat entiteite te ontwikkel.
Die Roggeveld-windplaas op die grens van die Wes- en Noord-Kaap naby Laingsburg, Matjiesfontein en Sutherland is vandag (24 Mei) amptelik geopen. Die plaas het ’n geïnstalleerde kapasiteit van 147 MW van die 47 turbines wat jaarliks sowat 613 GWH per jaar sal opwek. Die plaas word besit deur die onafhanklike globale kragverskaffer Red Rocket. Dit is sedert einde Februarie vanjaar operasioneel. Bouwerk vir die plaas het in 2019 begin en R4,4 miljard beloop.
Bredell sê herbubare energieprojekte soos dié plaas is tans baie welkom in Suid-Afrika aangesien dit druk op die nasionale kragnetwerk verlig. “In hierdie stadium is elke watt wat tot die nasionale netwerk gevoeg kan word noodsaaklik. Dit sal Eskom die geleentheid bied om sy sake in orde te kry.”
Die feit dat die private sektor belê in kragopwekking beteken egter nie volgens hom dat dit nie steeds die regering se verantwoordelikheid bly om kragsekerheid in die land te verseker nie. “Die private sektor word deur wins gedryf, terwyl die regering ’n verantwoordelikheid het om na die kwesbaarste mense in ons gemeenskappe om te sien. Die vennootskappe tussen die staat en ondernemings kan net werk indien albei partye aan hul mandate voldoen.”
Volgens hom sal die Roggeveld-windplaas genoeg krag opwek om krag aan 49 200 huishoudings te voorsien en koolstofvrystellings met 502 900 ton verminder.
