Die Turkse maatskappy AgroCosan het ’n misblaser-aanhegsel ontwikkel wat by sy reeks trekkergemonteerde balkspuite aangebring kan word. Die tenks het ’n kapasiteit van 200 liter tot 1 000 liter.
Die spuitbalk kan losgebout en die misblaser in sy plek vasgebout word. Al het hierdie spuite nie ’n ingeboude waaier nie, dryf die trekker se kragaftakkeras die spuit se pomp aan sodat die misblaser-aanhegsel genoeg druk vir ’n vloeitempo van ongeveer 80 liter per minuut kan hê.
Die spuitpunte kan met die hand gestel word om die plante wat bespuit word, akkuraat te tref. Een kant van die aanhegsel kan met die hand afgeskakel word indien dit nie nodig is nie, en elke individuele spuitpunt kan met die hand oop- of toegemaak word.
