Die navorsing word gebruik om te help bepaal hoe sekere chemiese elemente gebruik kan word om gewasse teen plae en siektes te beskerm.
Die navorsing word gedoen met ’n sinchrotronlig wat vervaardig word deur Canadian Light Source (CLS), wat aan die Universiteit van Saskatchewan verbonde is.
In ’n verklaring sê CLS uie is geskik om vir die navorsing te gebruik omdat dit maklik is om ’n enkele laag selle weg te skil om na veranderinge in die selwande te kyk. Selwande is ’n sleutelstruktuur in plante vir beskerming teen plae en siektes.
Die navorsing word gelei deur me. Ariana Forand, ’n meestersgraadstudent aan die universiteit se kollege vir landbou en biobronne. Sy gebruik sinchrotronlig om te verken hoe kalsium en boor ’n voordelige rol speel in die versterking van plante se selwande, om sodoende die dehidrasie van plante as gevolg van koue en droogte te help verminder en hul weerstand teen plae en siektes verhoog.
Luidens die verklaring is ’n unieke kenmerk van Forand se navorsing dat dit na veelvuldige stresfaktore gelyktydig kyk, naamlik dehidrasie in Walliese uie en kookuie, en patogeenweerstand in Arabidopsis wat wyd as ’n modelorganisme in plantbiologie gebruik word.
Een aspek van Forand se navorsing was om kalsium gemeng met water toe te dien vir uie wat in ’n kweekhuis gekweekte is. Sy het toe sinchrotron X-straalmikroskopie gebruik om te bevestig dat die uieplante die kalsium nie net opgeneem het nie, maar dat dit ook in die plante se selwande gevind is. Verdere toetsing het getoon dat hierdie kalsium in die selwande gehelp het om waterverlies van die uieplante te verminder.
Hierdie navorsing het ook bevind dat boor wat aan Arabidopsis-plante gegee word, met die pektien in hierdie plante se selwande bind. Dit versterk hierdie wande se weerstand teen siektes.
“Ons het na maniere gekyk om selwande struktureel te versterk. Die bevestiging dat kalsium en boor die impak van vogverlies en siektes verminder, dien as aansporing om na ’n soortgelyke effek in ander plante te soek,” sê Forand.
Dr. Karen Tanino, ’n dosent in plantwetenskappe aan die universiteit en Forand se studieleier, sê in enige gegewe jaar kan een stresfaktor meer algemeen voorkom as ander en dat dit moeilik is om te voorspel watter een dit sal wees. Forand se navorsing bied ’n geleentheid om plante teen alle stresvariasies van jaar tot jaar te beskerm.
Tanino was die eerste plantwetenskaplike navorser aan die universiteit wat sinchrotrontegnieke by die CLS gebruik het. Sy sê hoewel die versterking van plantselwande teen verskeie stresfaktore nie ’n volledige oplossing is nie, “is dit die eerste linie van verdediging”.
