Die groeiende prysgaping tussen die produsente- en verbruikersprys vir aartappels wek kommer en Aartappels Suid-Afrika (ASA) skaar hom by diegene wat glo dalings in insetkoste, waar moontlik, moet die verbruiker bevoordeel.
ASA vra nou reguit waarom 2008 se lae aartappelpryse nie ten volle aan die verbruiker deurgegee is nie.
Gedurende Oktober 2007 het markvoorrade gedaal en is rekord hoë aartappelpryse behaal. Aartappels was een van slegs twee produkte uit 65 voedselprodukte wat vanaf Oktober 2007 tot Oktober 2008 'n daling in die verbruikersprys getoon het. Die produsenteprys het oor hierdie tydperk met 45% gedaal, maar die gemiddelde kleinhandelsprys vir 10 kg met slegs 36% en vir 1 kg met 'n skamele 8%, volgens mnr. Mark du Plessis, uitvoerende hoof van ASA.
Produsentepryse het vanaf Oktober 2008 weer begin styg, maar tot die verbruiker se nadeel het kleinhandelspryse vinniger en meer as die produsenteprys gestyg. Uit produsentegeledere word die vraag gevra waarom daar geen korrelasie tussen die op- en afwaartse beweging van die produsenteprys en die verbruikersprys is nie.
3 Februarie 2009
