Die wenners van die vyftiende Absa Top 10 Pinotage-kompetisie is Donderdag (25 Augustus) bekend gemaak en sluit ou gunstelinge sowel as ’n paar nuwelinge in.
’n Onlangse styging in die prys van Pinotage, ’n wyndruifkultivar wat op tuisgrond ontwikkel is, kan onder meer aan verbeterde gehalte en die unieke Pinotage-storie verklaar word, het die “vader van Pinotage”, mnr. Beyers Truter, tydens die bekendmaking van vanjaar se tien beste Pinotage-wyne gesê.
Wenners
Kanonkopse Pinotage 2006 het gesorg dat dié wynkelder die negende keer die Top 10 haal. Beyerskloof (Stellenbosch) en Rijk’s Privaatkelder het elkeen vir die sesde keer gewen. Dit was vir onderskeidelik Beyerskloof Reserve 2008 en Rijk’s Pinotage 2007. The Mentor’s Pinotage 2009 het aan die KWV sy derde oorwinning besorg.
Mnr. Pierre Wahl, wynmaker van Rijk’s naby Tulbagh, sê een van hul groot voordele is Tulbagh se lekker grond.
“Ons kan sag werk met die druiwe, en steeds ’n mooi wyn maak.”
Die druiwe vir Beyerskloof se top-Pinotage kom uit ’n ou bosstok-wingerd wat met die hand gepluk word, het die wynmaker, mnr. Anri Truter vertel. ’n Nuweling op die lys is Diemersdal-wynkelder by Durbanville. Volgens me. Marie van der Merwe, wynmaker, word die wyn ook gemaak van ou bosstok-wingerd, wat reeds in die 1970’s geplant is.
“Dit is die enigste blok op die plaas met ’n bietjie geskiedenis. Drie geslagte van die ses geslagte Louws het van hierdie wingerd wyn gemaak. Ons pars dit met die hand en gis dit in ses 1 ton-kuipies. Dit word elke twee uur deurgedruk om die kleur en geur te kry.”
Inheems
Pinotage word beskou as Suid-Afrika se enigste inheemse wingerdkultivar wat op kommersiële skaal verbou word. ’n Boks met verlede jaar se Top 10-wyne het onlangs op ’n veiling in Kuilsrivier vir R15 000 verkoop. Twee bottels Pinotage het op Riversdal op ’n veiling vir R3 000 onder die hamer gekom.
“Die redes daarvoor is eerstens gehalte. Die Godgegewe faktore, soos die grond en die klimaat, speel ’n groot rol, maar die produsente volg ook goeie wingerd- en kelderpraktyke.
Pinotage is nie meer net ’n kultivar nie, maar het ’n handelsmerk geword, danksy 15 jaar se Top 10-kompetisies, wynproeë en koskonserte saam met bekende persoonlikhede. Dit het Pinotage ’n huishoudelike naam gemaak,” het Truter sr. gesê.
Hy reken dit is ook ’n unieke verkoopspunt (USP) vir Suid-Afrika.
“Daar moet iets fout wees as jy ’n internasionale wynliefhebber is en nog nie van die Pinotage-storie gehoor het nie. Die uniekheid van Pinotage maak dit ’n USP vir ons land.”
Die tien wyne wat vanjaar se Top 10-lys beklee, is: Beyerskloof Reserve 2008, Diemersdal Reserve 2010, Fairview Primo 2009, Kanonkop Pinotage 2006, KWV The Mentor’s Pinotage 2009, Laibach 2010, Naledi 2009, Rijk’s Privaatkelder 2007, Schalk Burger & Seuns Meerkat 2009, Windmeul Reserve 2010.
26 Augustus 2011
