Een van die grootste probleme vir daggakwekers wêreldwyd is die bekamping van poeieragtige skimmel, wat groot skade aan dagga-aanplantings kan rig. Tegnologie wat vir die Amerikaanse ruimte-agentskap Nasa ontwikkel is, word nou ingespan om dié probleem op te los.
Airocide®, wat tans by die Cannabis Expo in Kaapstad uitgestal word, is onlangs in Afrika bekend gestel. Dit gebruik geoptimaliseerde fotokatalitiese oksidasietegnologie, wat vir Nasa ontwikkel is om infeksies te beheer.
Deur hierdie tegnologie in te span waar gewasse wat binnenshuis gekweek word, kan die skimmel en ander patogene, wat in die lug versprei, en opbrengs en gehalte kan benadeel, verminder word. Airocide® word reeds suksesvol in Amerika en ander lande wêreldwyd aangewend om poeieragtige skimmel te bekamp en het nou plaaslike kwekers se belangstelling geprikkel.
Mnr. Sibusiso Xaba, medestigter en uitvoerende hoof van die Africa Cannabis Advisory Group, sê proeflope word reeds met dié produk gedoen en verdere proeflope word vir vanjaar in die Wes-Kaap en Gauteng beoog. Volgens hom het sommige daggakwekers reeds ’n verbetering in hul aanplantings opgemerk.
Xaba sê poeieragtige skimmel is een van die grootste probleme vir daggakwekers wêreldwyd. Dit is veral ’n kwessie vir Suid-Afrika wat ’n nuwe toetreder tot die globale daggamark is. Volgens Xaba hang Suid-Afrika se sukses in die globale daggamark en die plaaslike bedryf se groei af van die aanplanting en gehalte van die dagga wat hier gekweek word.
Die Cannabis Expo word tot 27 Maart by GrandWest in Kaapstad aangebied. Dit is die eerste keer sedert die begin van die pandemie dat dié ekspo aangebied word. Dit sal ook later vanjaar in onder meer Durban, Pretoria en Johannesburg aangebied word.
