Die Concours Mondial du Sauvignon-kompetisie sal van 13 tot 17 Maart by die Le Franschhoek Hotel en Spa in Franschhoek plaasvind. Die beoordeling sal oor drie dae plaasvind, waarna die finale uitslae op 20 Maart in Düsseldorf, Duitsland, bekend gemaak sal word op Prowein, die enigste internasionale handelskou wat die volledige wêreldmark dek.
Mnr. RJ Botha, voorsitter van Sauvignon Blanc Suid-Afrika, sê hierdie geleentheid is ’n droom wat waar geword het. “Ons het vier jaar gelede met onderhandelinge met mnr. Quentin Havaux, direkteur van die Concours Mondial du Sauvignon, begin. Ná maande se samesprekings, vennote betrek en byna onmoontlike planne wat gemaak is, pluk ons die vrugte van ons arbeid. Dis hier. Dit is nou. Wat ’n wonderlike geleentheid vir ons kultivarorganisasie, ons wynbedryf en ons land om ons veerkragtigheid, uitnemendheid en Mzansi-gees ten toon te stel.”
In die kompetisie sal meer as 1 000 Sauvignon blanc-wyne meeding om die aandag van 50 beoordelaars te kry, waarvan 40 internasionaal en 10 plaaslike wynkenners is. Die paneel internasionale proeërs sluit in me. Andrea Amadei, joernalis by Decanter in Italië, me. Jean Smullen, joernalis en wyngeleentheidsbestuurder in Ierland, me. Paula Sidore, ’n wynskrywer van Duitsland, mnr. Peter de Leeuw, besturende direkteur van Kaapwijn Import De Leeuw in België, mnr. Christophe Bourgeois, wynprodusent in Frankryk, me. Daphne Teremetz, wynaankoper by Waitrose in Brittanje, en mnr. Stefan Potzinger, president van die Oostenrykse Wynvereniging. Die res van die internasionale proeërs kom uit Brasilië, Kroasië, Denemarke, Italië, Mexiko, Nederland, Noorweë, Pole, Spanje, Swede, Oostenryk, België, Duitsland, Frankryk, Brittanje en Amerika
Die Suid-Afrikaanse beoordelaars is die Kaapse Wynmeesters dr. Winnie Bowman en me. René Groenewald, asook me. Heidi Duminy, mnr. Francois Rautenbach, dr. Carien Coetzee, me. Cathy Marston, mnr. Christian Eedes, me. Fiona McDonald, mnr. Joseph Dhafana en me. Malu Lambert.
Tydens die kompetisie word Suid-Afrika se Sauvignon blanc-streke ook ten toon gestel deur daaglikse uitstappies na Durbanville, die Constantia-wynvallei en Stellenbosch met spesiale aandetes wat deur Diemersdal, Groot Constantia en Vergelegen aangebied sal word.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
