Met 4,4 ha in bewaring vir elke hektaar waarop geproduseer word, ‘n toename van 46% in biomassa in minder as 10 jaar en ‘n inperking van 42% van erosie, is dit geen raaisel waarom Graham Beck Wyne met die Beste-omgewingspraktyke-toekenning weggestap het by die Nedbank Groen Wyn-toekennings nie.
Reyneke, Suid-Afrika se eerste biodinamiese wingerd en wynmakery, se Reyneke Woolworths Chenin Blanc 2009 is as die Beste Organiese Wyn bekroon.
Graham Beck – met plase in Robertson en Franschhoek – suiwer ook elke maand sowat 3 miljoen water vir besproeiingsdoeleindes. Dié water het ‘n beter gehalte as die water wat in die Breërivier aangetref word.
In harmonie met omgewing
Volgens die bewaringsbestuurder, mnr. Mossie Basson, maak die plase ook staat op tegnologie om so noukeurig moontlik en in harmonie met die omgewing te boer. Hulle gebruik infrarooi-tegnologie om die grondsoorte te karteer, grondpeilstiffies bepaal die grondvog en gevolglik ook die besproeiingsbehoeftes en sagteware word ingespan om wingerdsiektes te voorspel sodat onnodige bespuiting uitgeskakel word. Skaars hulpbronne soos water, brandstof en elektrisiteit word ook met rekenaarsagteware beskerm. Alle plaasafval word herwin.
‘n Verskeidenheid seldsame en waardevolle sukkulente-Karoo ekosisteme, die oewerkonyn en Breedesand-fynbos kom op die plaas voor en daarom word 600 h van die 2203 ha vrywilliglik as ‘n bewarea bestuur. “Ons is eko-stryders met die missie om die plase in ‘n beter toestand te los as wat ons hulle gekry het,” sê Basson.
Suid-Afrikaanse verbruikers volg toenemend die internasionale neighing om organiese wyn vir gesondheids- en omgewingsredes te koop. Mnr. Johan Reyneke, eienaar van die plaas Uitzicht naby Stellenbosch en die man agter die Reyneke-etiket, sê: “Die bedoeling is om so min as moontlik in te meng en om die natuur toe te laat om die eintlike wynmaker te wees. Só produseer ons ware terroir-spesifieke wyne van die hoogste gehalte.”
22 November 2010
