Dit is hier waar hy die “tweede hoofstuk” van sy lewe gaan afskop en as wynmaker sy voete, saam met mense van oor die wêreld heen, in Amerikaanse druiwe gaan druk.
Virginia het meer as 350 wynkelders en is tans die agtste grootste wynboudeelstaat in Amerika.
“Ek is vanjaar 50 en het besef ek wil die volgende paar jaar iets heeltemal anders doen. Ek het gereeld na onder meer Italië, Spanje, Frankryk en Kalifornië gereis om meer van hul wynmaakprosesse te leer. Ek het daardie ervaringe ontsettend baie geniet,” vertel Gerber aan Landbouweekblad.
“Toe ’n vriend vir my van die geleentheid by die Amerikaanse kelder vertel, het ek die kans met albei hande gegryp. Dis ’n nuwe geleentheid.
“En gelukkig het my vrou ingestem!” vertel hy laggend.
Gerber sê dat sy 23-jarige diens by een van Suid-Afrika se mees ikoniese wynkelders ’n droomwerk vir enige wynmaker was.
Hoewel hy en sy vrou, Michaela, ’n fisoterapeut, en hul twee kinders, Georgie (6) en Anton (5), opgewonde is oor die Groot Trek, was dit nie ’n maklike besluit om te neem nie, erken hy.
“Groot Constantia Wynlandgoed en die span sal altyd ’n spesiale plek in my hart hê, en ek is ongelooflik trots op wat ons bereik het. Ek is lief vir die plek, daar is geen ander soos dit in die wêreld.”
Mnr. Jean Naudé, uitvoerende hoof van Groot Constantia, sê hulle ondersteun Gerber se besluit ten volle om vars uitdagings en nuwe horisonne, ná soveel jare as ’n kampioen onder Suid-Afrikaanse wynmakers, te gaan soek.
Van student na kampioen
En ’n kampioen onder wynmakers is Gerber beslis, maar op universiteit was dit nooit sy plan nie.
As eerstejaarstudent het hy ingeskryf vir ’n BSc-graad aan die Universiteit Stellenbosch.
In Dagbreek, die manskoshuis waarin hy was, het sy kamermaat, wat wynkunde studeer het, hom gevra wat hy met ’n BSc wil doen. Dit het nie veel gekos om Gerber te oortuig dat wynkunde “’n lekkerder rigting” is nie.
Kort daarna is Gerber huis toe om sy ouers te vertel van sy plan om van studierigting te verander.“
Dit was sommer net so, onbepland,” sê hy en lag wanneer hy aan sy koshuisdae terugdink.
Min het hy geweet hoe suksesvol hy daarin sou wees.
“Boela het oor die jare ’n aansienlike impak op Groot Constantia gemaak – hy het nie net ’n sleutelrol gespeel in ons doel om deurlopend goeie wyne te maak nie, maar hy het sy vaardige sakevernuf aan alle aspekte van die besigheid geleen – van verpakking tot bemarking, verkope en omtrent alles tussenin. Die span het heelwat by Boela geleer en ons sal voortgaan om in kontak te bly en sy verwagte voortgesette sukses te monitor.”
Naudé vertel hoe Gerber en hyself in 2003 hand aan hand gewerk het aan 'n wingerdvernuwingsplan wat daartoe gelei het dat Groot Constantia wêreldklaswyne geproduseer het wat top-toekennings in internasionale kompetisies wen.
Groot Constantia adverteer tans Gerber se pos as wynmaker by die landgoed.
“Ons sien daarna uit om ons nuwe wynmaker te verwelkom en om Groot Constantia se nalatenskap van volgehoue wynmaakuitnemendheid voort te sit,” sê Naudé.
Hy het geen raad vir die nuwe wynmaker nie, vertel Gerber.
“Na só lank in die pos sal dit goed wees om iemand nuut aan te stel met opwindende en vars idees. ’n Nuwe besem is goed.
"Iemand wat kan voortbou op die beste wat ons bereik het, en kan verbeter op die plekke waar ons tekort geskiet het.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
