Vroeë ramings dui daarop dat vanjaar se olyfoes amper twee keer meer as dié van verlede jaar kan wees, sê mnr. Andries Rabie, voorsitter van Olive SA en direkteur van die Willow Creek-landgoed in die Nuyvallei.
Hy het in Desember verlede jaar aan Landbouweekblad gesê sowat 800 ton olyfolie word verwag en hy hou daarby vol. Dit lyk tans asof ongeveer 3 000 ton tafelolywe vanaf Mei tot Julie geoes gaan word. Verlede jaar is slegs 400 ton olie en 1 500 ton tafelolywe gelewer.
Olyfboere meen die gehalte van die oes is vanjaar iets besonders.
'n Gunstige klimaat, beter kultivars en beter boerderypraktyke is die rede vir dié goeie oes.
Die droë, sonnige toestande in die Wes-Kaap die afgelope ruk het gehelp. Die olyfoes behoort selfs die verwagte laat winterreën te systap aangesien die olywe teen Julie geoes behoort te wees. Die gehalte van die olie behoort dus nie deur nattigheid belemmer te word nie.
Mnr. Gerrie Duvenage, bestuurder van die olyfvertakking op die Morgenster-landgoed, Somerset-Wes, sê dit lyk asof die meeste olyfplase 'n groot oes verwag. Hy sê olywe het 'n wipplanksiklus weens die bome se alternatiewe draagpatroon. Verlede jaar was 'n besondere 'af' siklus.
Weens die goeie winter het die bome egter 'n goeie rustydperk gehad. Hy sê die oes is swaar, maar nie té swaar nie. Dit lyk dus asof die bome volgende jaar ook goed sal dra. Hy meen selfs die alternatiewe draagpatroon kan egter deur goeie boerderypraktyke, soos die regte bemesting, bestuur word.
Mnr. Gerhard du Toit van die Hillcrest-plaas naby Durbanville hoop om vanjaar sowat 30 ton olyfolie en 15 ton tafelolywe te oes. Hy sê hy is optimisties, want daar is baie ruimte vir uitbreiding in die olyfbedryf.
Rabie sê tans is sowat 600 ha onder olyfbome beplant. Volgens hom neem die plaaslike verbruik van olyfprodukte jaarliks met 25 % toe.
Landbouweekblad, 27 April 2007
