Nou boer sy met spinasie, botterskorsies, murgpampoentjies en kool op 3 ha grond en verskaf groente aan markte in Limpopo en Gauteng.
Die 29-jarige het ook onlangs haar eerste hektaar aartappels geplant. Dit bring haar nog ’n tree nader aan haar droom om ’n aartappelboer te wees en by te dra om voedselsekerheid en werksgeleenthede vir die dorp Bochum naby haar plaas te verseker. Sy hoop om eendag deel van Aartappels SA se ontwikkelingsprogram te word.
Mokgobu het ornamentele tuinbou aan Unisa gestudeer, maar gedurende ’n internskap besef dat sy iets meer tasbaar met haar vaardighede wil doen. Dit het gelei tot die totstandkoming van Mosibudi Trading Enterprise.
Soos vele ander entrepreneurs en opkomende boere moes sy leer hoe om ’n onderneming te bestuur. Deur haar betrokkenheid by De Beers se ontwikkelingsprogram vir ondernemings het sy sakevaardighede soos boekhou en bemarking geleer. Mokgobu sê haar betrokkenheid by die program het haar die selfvertroue gegee om haar onderneming uit te brei en doeltreffender te wees.
Een van die eerste dinge wat die program haar geleer het, is om te diversifiseer. Daarom verdien sy ook ’n inkomste uit tuinuitleg en deur in video-oproepe lesse en raad aan ander kleinboere reg oor Afrika suid van die Sahara te gee.
Sy het groot doelwitte vir haar onderneming gestel, maar voor sy skouer aan die wiel daarmee kan sit, moet sy 16 ha ontbos, ’n spilpunt oprig, nog ’n boorgat sink en die plaas se kragvoorsiening tot driefase verander.
Haar raad aan ander entrepreneurs wat hulself in ’n soortgelyke posisie bevind, is om klein te begin met dit wat hulle reeds het. Dan moet inkomste en grond, waarop hulle kan woon ten einde dit doeltreffend te bestuur, bekom word. “Jy moet ook seker maak dat jy water het voor jy met enigiets begin. Jy kan nie net op reën staatmaak nie. Laastens, stel jouself aan die mark voor. Sodra mense jou ken, is dit makliker om jou produkte aan hulle te verkoop.”
