Die myngroep AEMFC gaan glo steeds voort met sy aansoek om prospekteerregte in die Wes-Kaapse wynlande, terwyl die teendeel verlede week aangekondig is.
Die African Exploration Mining and Finance Corporation (AEMFC), gaan na bewering met sy aansoek vir prospekteerregte in die Wes-Kaapse Wynlande voort, terwyl die Regering en die maatskappy verlede week die teendeel aangekondig het.
Volgens mnr. Gary Jordan, die eienaar van die Jordan Wynlandgoed, wat deur die aansoek geraak word, het die Departement van Minerale en Energie hul Maandag ingelig dat dié maatskappy se aansoek vir prospekteerregte voortgaan.
Hy sê volgens mnr. Msikizi Mafuya van die Kaapstadse kantoor gaan die aansoek voort en was stellings dat die aansoek opgeskort is “vals”. Die aansoek raak die Bottelary-gebied naby Stellenbosch asook wynlandgoedere aan die voet van die Tygerberg.
Dit volg na mnr. Mputumi Damane, die hoof van AEMFC, verlede week in ‘n verklaring gesê het hulle het besluit om die aansoek te herroep. “Op grond van ‘n aangepasde strategiese baan het ons besluit om die aansoek vir prospekteringsregte in die Wes-Kaap by die Departement van Minerale Bronne te herroep”.
Jordan sê die Wynlande Aksiegroep is baie onsteld oor die maatskappy se beweerde ommeswaai. “As hierdie situasie net die gevolg van verwarring is, dan vra die Wynlande Aksiegroep dat die hoof van AEMFC ‘n gedetaileerde verklaring moet uitreik waarin die nommers van die prospekteerregte wat herroep is weergegee word, en dat die maatskappy se konsultante, GCS, en die DME se Kaapstad kantoor dieselfde doen”.
Staat het ‘n herroeping aangekondig
Intussen het adv. Sandile Nogxina, die Direkteur-Generaal van minerale bronne, verlede week gesê die aansoek gaan nie voort nie. Luidens ‘n berig in Die Burger het Nogxina gesê die staatsbeheerde maatskappy het glo na hulle die aansoek ingedien het uitgevind die gebiede word aangewend vir wingerde en wynbou.
Volgens die berig het Nogxina gesê na aanleiding van sy gesprekke met die maatskappy gaan hulle beslis hulle prospekteerreg-aansoeke terugtrek. Hy het gesê die mynboumaatskappy sal nie ’n “agterdeur” kan vind ten opsigte van die aansoek nie. “Die wetlike prosesse maak dit onwettig vir ons om so ’n aansoek toe te staan.”
Mnr. Jeremy Micheals, die hoof van kommunikasie en internasionale koördinering by die departement, het verlede week gesê: “Soos ons verstaan, was die ontginningsaansoek deur AEMFC gebaseer op ‘n geologiese studie wat deur die maatskappy gedoen is. Hulle was nie bewus daarvan dat die grond vir wynproduksie gebruik word nie. Die maatskappy het eers ontdek daar was wynplase op die grond toe hulle met die konsultasieproses begin het. Daarom is dit onwaarskynlik dat hulle met die aansoek sal voortgaan.
Bron: Die Burger
17 Maart 2010
