Volgens prof. Stephanie Midgley, wetenskaplike oor klimaatsverandering en risikobepaling by die Wes-Kaapse departement van landbou en sameroeper van die simposium, is die byeenkoms belangrik om plaaslike gemeenskappe en ekonomieë te versterk.
“Beter bestuur van water in die landbou sal lei tot beter opbrengste en inkomste per druppel en toekomstige voedselsekerheid en lewensbestaan verseker,” sê sy.
Meer as 150 simposiumgangers van 18 lande, asook plaaslike kundiges en praktisyns sal die geleentheid kry om te leer oor die nuutste wetenskaplik gefundeerde en verbeterde besproeiingstegnologie. Die simposium van 29 Januarie tot 2 Februarie 2023 is ’n inisiatief van navorsers van die Wes-Kaapse departement van landbou, die Universiteit Stellenbosch (US) en die Universiteit van Pretoria.
Landbouweekblad erken die deurslaggewende rol wat besproeiing in voedselsekerheid speel en is daarom ’n mediavennoot van die simposium.
“Ons is meer as 100 jaar al saam met Suid-Afrikaanse boere op reis om volhoubare winsgewendheid te verseker. Geleenthede soos dié waar die uitruil van inligting belanghebbendes in die landbou kan bemagtig, is vir ons ’n prioriteit,” sê Chris Burgess, hoofredakteur van Landbouweekblad.
Netafim, hoofborg van die simposium, glo dat plaaslike boere van tuinbougewasse wêreldleiers in gevorderde landboupraktyke is.
“Ons is trots daarop om betrokke te wees by ’n geleentheid wat volhoubaarheid en volgehoue verbetering voorop stel,” sê Michael Esmeraldo, besturende direkteur van Netafim Suid-Afrika.
Midgley sê hulle sien uit na ernstige gesprekke en om voorraadopname te doen oor “waar ons staan met datagebaseerde presisiebesproeiing en sensortegnologie”.
“Dis belangrik om te bepaal wat werk in praktyk en wat werk nie soos ons gehoop het nie; en te identifiseer waar daar kennis- en tegnologiegapings is wat ons met toekomstige navorsing kan aanpak.”
Die ontwikkeling en toetsing van die volgende generasie laevloei- en ultra-laevloei-drupbesproeiingstelsels en die meting en modellering van evapotranspirasie vir besproeiingskedulering kom ook onder die vergrootglas.
Simposiumgangers kan ook uitsien na ’n besoek aan drie plase waar uiteenlopende besproeiingsnavorsing en -innovasie gedoen word. ’n Tegniese dag sal plaaslike deelnemers die geleentheid gee om onder meer saam te gesels oor presisiebesproeiingstelsels, tekortbesproeiing en droogtespanning, en deel te neem aan ’n paneelbesprekings oor die raakvlakke tussen wetenskap en die praktyk.
Hou Landbou.com dop vir meer oor dié simposium of volg #ISHSirrigation2023 op sosialemediaplatforms.
