Suid-Afrikaanse navorsers, onder leiding van prof. Dirk Bellstedt van die Universiteit Stellenbosch (US), is die enigste wetenskaplikes uit Afrika wat ingesluit is by ’n groeiende netwerk van kundiges wat saamwerk om die wêreldwye invloed van virussiektes in aartappels te beperk.
Dit het aan die lig gekom op die Afrika Aartappelprodusente-assosiasie se kongres in Kaapstad. Die Suid-Afrikaanse navorsers is lede van die PVY-Wye Organisasie, wat navorsers van 26 instellings in 20 lande in Suid- en Noord-Amerika en Europa saamsnoer om die verspreiding van die aartappelvirus Y, (Potato Virus Y) of PVY, te beperk.
PVY veroorsaak mosaïeksiekte op aartappels wat tot verlaagde produksie en misoeste lei. Die nuwe PVYNTN-variant kan ook nekrotiese letsels op knolle veroorsaak. Dit is die eerste keer in die 1930’s opgemerk en is veral sedert die 1980’s wêreldwyd ’n probleem vir aartappelboere.
Na raming is tot 60% van alle aartappelplante in Suid-Afrika met PVY besmet. Pleks daarvan dat elkeen apart op dieselfde virus werk, word binne die netwerk kragte saamgesnoer om die virus te bekamp, sê Bellstedt.
Lees meer in Landbouweekblad se uitgawe van 21 Januarie 2011.
17 Januarie 2011
