Nederburg-wyne is die jongste lid van die Wêreldnatuurfonds (WWF) se Biodiversiteit & Wyn-inisiatief nadat hy die nodige akkreditasie ontvang het.
Luidens ’n verklaring moes die wynmakery minstens vyf plase hê wat aan bewaringsmaatreëls voldoen om die BWI-status te ontvang.
Die bewaringspogings van een van die wynmakery se grootste verskaffers het tot die toekenning van die status bygedra.
Twee plase het reeds status
Sowat die helfte van Nederburg se druiwevoorraad kom van sy eie plase, wat Nederburg self, Groenhof in die Koelenhof-area by Stellenbosch, Plaisir de Merle in Simondium, en Papkuilsfontein – ’n droëlandplaas naby Darling – insluit.
Die laasgenoemde twee plase het reeds hulle BWI-status ontvang omdat hulle onderskeidelik 500 ha en 150 ha vir bewaring opsy gesit het.
Spekboomheinings
Mnr. Hannes van Rensburg, die groepbestuurder van Nederburg-wynplase, sê deeglike ondersoeke is onderneem voordat die status aan hulle toegeken is.
Hy sê op Nederburg se 244 ha, waar die wynmakery gehuisves word, is baie min onbewerkte grond waarop inheemse plantegroei gevestig kan word. Derhalwe is, onder meer, spekboomheinings (Portulacaria afra) aangeplant omdat hulle koolstof goed opneem en in die grond bewaar.
Volgens beplanning sal wilde-ertjieplante (Vicia benghalensis) tussen die spekbome geplant word. Dit sal dien as voer vir die Hereford- en Angus-koeie, wat op hul beurt weer natuurlike bemesting vir die wingerde voorsien.
Gefiltreerde afvalwater
Dié plaas benut ook die kelders se afvalwater deur dit te filtreer en dan weiveld daarmee te besproei, soos wat ook op Plaisir de Merle die geval is.
Op Groenhof is op die verwydering van indringerplante vir beter waterbalans en verminderde watergebruik gefokus.
Die wynmakery het ’n parsvermoë van sowat 20 000 ton druiwe per jaar en sy produkte word wêreldwyd uitgevoer.
* Nederburg het by die 2010 Tri Nations Wine Challenge, die trofee vir die beste dessertwyn gewen. Lees die storie hier.
5 Julie 2011
