Eerste Nasionale Bank het as die borg vir die jaarlikse Sauvignon blanc Top 10-kompetisie toegetree.
Luidens ’n verklaring is dit die vyfde keer wat die Sauvignon blanc-belangegroep (SBIG) die kompetisie, met die samewerking van ’n borg, aanbied. Dit is voorheen deur die Wine Magazine geborg.
“Ons is werklik dankbaar vir ENB se toetrede as borg om te verseker dat die kompetisie voortgaan. Ons sien daarna uit om met ENB hande te vat in die bevordering van Suid-Afrikaanse Sauvignon blanc, en vereenselwig ons met die doelwit om Sauvignon blanc die plaaslike en internasionale erkenning te laat kry wat dit verdien,” sê Erika Obermeyer, voorsitter van die SBIG.
Intussen is die top-20 Sauvignon blanc-wyne aangekondig. Die 10 wenners vir die ENB Sauvignon Blanc Top-10-kompetisie sal uit dié groep gekies word. Die toptien wyne word op 4 November 2011 bekend gemaak.
169 wyne
Altesame 169 wyne is vir die kompetisie ingeskryf. Van dié wyne het 27 vier of meer sterre van beoordeelaars ontvang. Van die inskrywings is van 100% Sauvignon blanc druiwe gemaak, maar van die wyne het ook ’n minimum van 85% van dié druiwe.
Vyf beoordelaars uit ’n wye verskeidenheid van bedrywe het die taak om die toptien wyne aan te wys. Die wyne is blind geproe – wat beteken die beoordelaars het geen aanduiding van oesjaar, kelderhantering of ’n tegniese ontleding gehad nie.
Daarvolgens het beoordelaars hul beoordeling op ’n 20-puntstelsel gegrond, wat na ’n stergradering omgeskakel is.
Mnr. Pieter de Waal, sekretaris van die SBIG en sameroeper van die kompetisie, sê die top-20 wyne sluit alle prysklasse – van R30 tot R200 per bottel in – met houtverouderde en ongehoute voorbeelde.
“Daar is ongetwyfeld ’n Sauvignon blanc in die top-20 wat elke beursie en elke smaak sal pas. Dit bevestig Sauvignon blanc se vermoë om as druifkultivar die beste van die streeksdiversiteit van Suid-Afrika se wynlande na vore te bring.”
1 November 2011
