’n Opname word tans gedoen om boere se gemiddelde koste tydens pluktyd in die steenvrugbedryf te bepaal, sê InnoFruit. Die onderneming sê boere beplan vooruit om hul koste tydens pluktyd laag te hou en met dié opname sal bepaal kan word wat die gemiddelde vir dié tydperk is en of hulle daaraan voldoen.
Mnr. André Avenant, een van die hoofde van Innofruit, sê boere kan tot einde April vanjaar die opname op www.innofruit.co.za voltooi. Dit is gratis en belangstellendes hoef nie vir die webtuiste geregistreer te wees om deel te kan neem nie.
Voorlopige resultate
Volgens die voorlopige resultate van die opname kontrakteer boere vir sowat drie en ’n half maande arbeiders van buite om met plukwerk te help. Die gemiddelde betaling vir ’n spanbestuurder beloop sowat R160 per dag, terwyl gemiddeld R81,40 per dag aan ’n trekkerbestuurder betaal word.
“Die inligting sal elke boer wat met die appel- en peerbedryf te doen het, help om te sien of hy in pas is met die gemiddelde wat ons met die opname per gebied gaan kry,” sê Avenant.
11 April 2011
