Uit 26 inskrywings het die Oranjerivier-wynkelder die enigste platinum-toekenning ontvang vir sy Rooi Muskadel 2012, asook ’n goue-toekenning vir sy Wit Muskadel 2012.
“Dit is vir ons ’n eer en wonderlike ervaring om erken te word deur Suid-Afrika se Muskadelvereniging; voorwaar ’n erkenning om op trots te wees,” sê mnr. Jim de Kock van dié kelder.
Die Breederiviervallei het sy reputasie as Muskadel-kontrei gestand gedoen en drie goue medaljes ingeoes met Rooiberg Wynkelder Rooi Muskadel 2012, Mooiuitsig Wynkelder Oude Rust Rooi Muskadel 2012 en Du Toitskloof Kelder Rooi Muskadel 2012.
Volgens mnr. Henri Swiegers, voorsitter van Muskadel SA en wynmaker in die Breederiviervallei, verkies Muskadelwyne droë en warm weerstoestande, maar ook genoeg water om die wingerd oordeelkunding mee te besproei. “Dit lei tot ’n hoë suikerinhoud en lae pH-vlakke wat juis die sukses van ’n muskadel bepaal. Suid-Afrikaanse produsente is baie toegewyd en poog altyd om die beste gehalte te lewer.”
Beoordeling en puntestelsel
Die wyne word blind geproe en volgens ’n deeglik beproefde puntestelsel beoordeel. Die uniekheid van die verpakking speel ook ’n rol in die puntetoekenning. Die wenwyne kan in winkels uitgeken word aan die Muskadel SA-plakker wat op die bottel aangebring word.
“Vanjaar se inskrywings was besonder goed, met goeie kompleksiteit en diepte van geur,” sê mnr. Dave Biggs, beoordelaar en wynkenner.
“Muskadel is een van die beste wyne wat die Suid-Afrikaanse wynbedryf jaarliks oplewer, en die beste wêreldwyd. Die stigma dat muskadel net ’n soetwyn en net ’n winterwyn is, is lankal iets van die verlede. Enartis SA, met die samewerking van Muskadel SA, het dit verander en sal in die toekoms daarop voortbou,” sê mnr. Steven Baard, verkoopsbestuurder van Enartis SA.
