Dié appels se pryse het met minstens 20% tot 30% gedaal.
Volgens mnr. Peter Dall, vrugteboer van Villiersdorp, vrugte-konsultant en voormalige voorsitter van die Sagtevrugte-produsentetrust, is die prysdaling nie van toepassing op appels wat aan supermarkprogramme verskaf is nie.
Dall het op die Overberg Vrugte en Wyn Ekspo op Villiersdorp gesê onwettige aanplantings in Sjina, essensieel afgeleide kultivars (EDV's) en 'n ooraanbod van veral Chileense vrugte dra die blaam vir die probleem op die groothandelmarkte.
"In Sjina is daar minstens 6 000 ha onwettig geplant. Hulle moes dit nooit gekry het nie. As jy hulle uitvra daarna, weet hulle niks nie, maar ons het al minstens ses Sjinese vraghouers in Europa gestop en die appels vir liefdadigheid gegee." Dall sê hy is nie seker hoe EDV's (byvoorbeeld mutasies) hanteer moet word nie.
Nog 'n groot bydraer tot die probleem was 'n ooraanbod van Pink Lady-appels in Julie en Junie. "Suid-Afrika het 'n klein probleempie met verbruining gehad en gevolglik het almal in Mei hul appels gepak en dit in Junie en Julie na die markte gestuur. Die antwoord is om Chili so ver te kry om net die helfte van die appels wat hulle vanjaar in Junie en Julie na Europa gestuur het, in die toekoms te stuur."
Dall sê ook daar lê 'n onontginde mark in Amerika en die Chilene moet aangemoedig word om eerder hul vrugte soontoe te stuur.
22 Oktober 2008
