Die covid-19-pandemie het groot skade aan veral die toerismebedryf aangerig. Volgens me. Adele du Toit van die Suid-Afrikaanse Rooibosraad het dit teetoerisme wêreldwyd egter ’n hupstoot gegee. Dit is veral te danke aan die herlewing in teeverbruik en die verkenning van die streke waar tee geproduseer word.
“Wêreldwyd het dié neiging daartoe gelei dat die bouvallige hutte en huise van teeplanters in boetiekhotelle en -huisvesting omskep word. Teeliefhebbers kan ’n vreedsame besoek geniet waartydens hulle deur die natuur omring word en meer oor hul gunstelingtreksel leer.”
Sy sê die meeste teeplantasies in die Cederberg, die enigste streek ter wêreld waar rooibos geproduseer word, is meer as 100 jaar of selfs 150 jaar oud en het ’n simbiotiese mengsel van toerisme en die landbou geword. Om ’n besoek daar af te lê, is ’n unieke ervaring wat ’n mens meer oor die plantasies, teekultuur en -erfenis leer.
