Die rosyntjie-oes van 2010 was die grootste nog en net meer as 50 000 ton is deur al die verwerkers gesamentlik ingeneem.
Mnr. Johannes Fourie, voorsitter van Droëvrugte Tegniese Dienste (DTD) en boer van Groblershoop, sê dit verteenwoordig meer as 200 000 ton vars pitlose druiwe.
‘n Rekord van 16,7 miljoen kartonne tafeldruiwe is boonop uit die Benede Oranjerivier uitgevoer, wat hoofsaaklik toegeskryf kan word aan baie gunstige weerstoestande. Die Oranjerivier Wynkelders het ongeveer 17 500 ton Sultana en Merbein Seedless, die vernaamste rosynekultivars, ingeneem.
Fourie sê dit dui in die algemeen op ‘n besonder groot produksie van pitlose druiwe in die Benede Oranjeriviergebied. Die hoeveelheid Thompson pitlose rosyne het redelik konstant gebly op ongeveer 46% van die oes, of 23 270 ton.
“Die uitstekende gehalte Goue Sultanas van die Oranjerivier het egter stelselmatig gegroei en beslaan 35% (17 700 ton) van die oes, terwyl 7 270 ton as ongebleikte rosyne ingeneem is. Daar is dus in die afgelope seisoen meer as 300 000 ton vars pitlose druiwe in die Oranjeriviergebied geproduseer wat aan verskillende bemarkingskanale gelewer is.”
Nuwe pitlose kultivars gevestig
Die ongeveer 7 500 ha Sultana-aanplantings toon ‘n afnemende neiging, terwyl al hoe meer nuwe pitlose druiwekultivars gevestig word. Meeste van hierdie aanplantings verteenwoordig tafeldruiwe, hoewel meer as 1 000 ha Merbein Seedless reeds vir rosyne gevestig is.
Volgens Fourie beloop die totale oppervlakte onder pitlose druiwe langs die Oranjerivier ongeveer 11 000 ha, wat daarop dui dat ‘n hoër gemiddelde oes as normaalweg verkry is en elke hektaar het sy kant gebring. Die rosynebedryf se stok-sensus dui aan dat die Sultana-stokke reeds baie oud is en grootskaalse vervanging sal oorweeg moet word om oeste van hierdie omvang vol te hou.
Die DTD het ‘n soektog geloods na verbeterde kultivars vir die droogbedryf, wat meer weerstandbiedend teen ongunstige weersomstandighede is en gereelde groter drag lewer om die winsgewendheid van die bedryf te verhoog. Hierdie kultivars word tans veral langs die Benede Oranjerivier geëvalueer, terwyl vermeerdering van die materiaal vir voortplanting terselfdertyd geskied.
Goeie bemarkingsmoontlikhede vir goeie gehalte rosyne bestaan steeds, terwyl pryse vanweë die globale resessie effens onder druk is. Hoewel kopers steeds gretig is om die goeie gehalte Suid-Afrikaanse droëvrugte te koop, koop hulle minder op ‘n slag en wil hulle nie tans groot voorrade dra nie. Die wisselkoers van die rand teenoor al die groot geldeenhede bly sterk wat ook ‘n ongunstige uitwerking op winsgewendheid van die plaaslike bedryf het.
9 Augustus 2010
