Foto: Landbouweekblad
Die finale opname onder hanteerders vir die 2022-makadamia-oes het bevestig dat Suid-Afrika steeds die wêreld se grootste produsent van makadamianeute is met ’n oes van 68 840 ton vir die jaar.
Dit was ’n 28,5%-verbetering op die 2021-oes van 53 858 ton.
Die makadamiabedryfsliggaam, Samac, finaliseer sy skatting vir die 2023-oes en vroeë aanduidings is dat dit weer ’n groot oes sal wees.
Makadamiakwekers is bekommerd dat daar ná drie jaar van streng covid-19-inperkings in China, een van Suid-Afrika se grootste markte vir makadamianeute, ’n groot oorskot van die 2022-oes op die mark lê aan die vooraand van die oestyd vir die 2023-seisoen.
Mnr. Pierre Cronjé, voorsitter van Samac, het egter op ’n onlangse vergadering met finansiële instellings daarop gewys dat die oordragvoorraad deure oopmaak vir verwerkers om makadamianeute as ’n permanente produklyn aan handelaars te bemark. “Tot nou toe kon ons dit nie doen nie, want ons kon nie volgehoue lewering waarborg nie. Met meer boorde in produksie, groter oeste en beskikbare oordragvoorrade kan ons nou sulke waarborge lewer.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
