Die Suid-Amerikaanse Victoria-waterlelie (Victoria cruziana) groei vir die eerste keer in 50 jaar weer in Suid-Afrika - dié keer op Potchefstroom.
Martin Smit, kurator van die Universiteit van Noordwes se Potchefstroomkampus se botaniese tuin, sê in die vroeë 1960’s is die lelie vir twee seisoene suksesvol in die Stellenbosse Botaniese Tuine gekweek.
“Ek weet van my voorgangers het intussen probeer om die lelie ook te groei, maar hulle was nie suksesvol nie. Dit is nogal moeilik, aangesien die lelie eenjarig is, so elke jaar probeer jy weer. Die sade moet ook nie aan temperature onder 16 ?C blootgestel word nie, dan ontkiem hulle nie. So dis moeilik om dít alles met die winters in Amerika, waarvandaan ons die sade moes invoer, reg te laat werk,” verduidelik Smit.
Dié plant se sade was afkomstig van ‘n besending vanaf die Universiteit van Helsinki.
Smit by sy lelies. Foto: VERSKAF
Moontlike sade vir SA
Luidens ‘n verklaring verwag kundiges by die botaniese tuine dat die plant nog groter sal word en binnekort sal begin blom. Smit sê die eerste bloeisel is reeds sigbaar, en as die plant begin blom, sal dit slegs vir sowat 48 uur wees. ‘n Plant kan tot 12 blomme per seisoen produseer. Dié blomme kan dan bestuif word, en die sade kan geoes word en gedurende ons winter bewaar word om volgende jaar weer suksesvol te probeer plant.
Smit sê verskeie ander botaniese tuine, wat die fasiliteite het om die lelie te kweek, het hom reeds gekontak omdat hulle ook daarin belangstel om die lelie te probeer plant.
Bron van stysel
Volgens Smit het dié plant ook landbouwaarde. Hy sê vroeg in die vorige eeu is dit deur die Indiane in Suid-Amerika aangeplant en geoes om verskeie stylselprodukte te vervaardig. Volgens inligting van die Hudson Gardens in Suid-Amerika word die sade steeds deur Indiane gebruik as koekmeel vir die bak van koeke.
“Dié besonderse plant trek gewoonlik skares mense by talle internasionale tuine, maar is bykans onbekend in Suid-Afrika. Hopelik kan die besonderse plante ook in die toekoms in meer tuine in Suid-Afrika ten toon gestel word en so ook help om mense se belangstelling in die plantwêreld te prikkel.”
Die NWU se botaniese tuin is daagliks van 08:00 tot 16:30 oop vir die publiek, en die tropiese glashuis waar die lelie groei, kan op spesiale versoek besigtig word.
Lees meer oor die lelie in die PDF-dokument hieronder.
17 Oktober 2011
