’n Stellenbosch-wyn is ’n Stellenbosch-wyn, dan nie? Allermins, meen wynkenners soos Barry Scholfield, sommelier en besturende direkteur van Somm & Co, wat onlangs ’n verskeidenheid Cabernet sauvignon-wyne uit die Eikestad geskink het om te demonstreer hoe Cabernet sauvignon-druiwe wat naby die berge groei, ’n ment-karakter aan die wyn verleen, terwyl druiwe wat naby die oseaan geoes word, ’n kruidagtige geur het.
“Dit maak nie saak wat jy doen nie, jy sal nooit ’n kruidagtige rooiwyn in die Banhoek-vallei produseer nie. Dit is sulke verskille wat beteken wynliefhebbers kan eers gunsteling-produsente identifiseer ná hulle bepaal het watter substreek se wyn hulle geniet,” sê Barry.
En om Stellenbosse wyn, met minstens 12 wynwyke en vyf subroetes, behoorlik (en maklik) te leer ken, het die sakeman Daniël Kriel met die Stellenbosse Wynroete hande gevat om ’n web-gebaseerde onderneming te vestig wat slegs wyn van Stellenbosch verkoop.
