Te oordeel na die welslae wat 'n boer met die vestiging van appelboorde in die Stormberge van die Noordoos-Kaap het, kan die gebied nog as een van die voorste streke vir die verbouing van dié vrugsoort ontpop.
Molteno het die potensiaal om een van die land se voorste distrikte vir die verbouing van appels te word. Nie net is die klimaat uiters geskik nie, maar ook die kleur wat die appels ontwikkel, kan beswaarlik geklop word, sê mnre. Francois le Roux (63) en sy seun Francois jr. (30) van die plaas Sunnyside, Molteno.
Hulle het die afgelope paar jaar baanbrekerswerk gedoen met die vestiging van appels hier. As die enigste appelboere in die omgewing, het die Le Roux's geen probleem met die afset van die vrugte nie. Trouens, selfs al sou hul produksie verdubbel, sal hulle steeds nie in die aanvraag kan voorsien nie.
Die huidige produksie van sowat 170 ton word in Queenstown en Aliwal-Noord deur twee bekende groentewinkels gekoop, wat die vrugte op die plaas kom oplaai. 'n Klein gedeelte word ook op Molteno van die hand gesit. Die prys word op 'n weeklikse basis volgens inligting wat op die internet beskikbaar is, bepaal.
Lees meer in Landbouweekblad se uitgawe van 3 April 2009.
2 April 2009
