Die Skot Alexander Baldie, ’n baanbreker in die vrugtebedryf, het in 1904 die boerdery J Baldie & Sons by Misgund in die Langkloof gevestig. In dieselfde jaar het hy ’n kommersiële appelboord, met bome van die Pickering-kwekery in die Wes-Kaap, geplant.
Boerderybloed vloei dik in die Baldie-are. Alexander se nasaat, Robin Baldie, wou van kleins af net boer. “Ek hou van boerdery omdat ek graag met mense werk, maar ook om die jong vrugtebome op te lei en hul groei dop te hou totdat hulle volwasse bome is,” vertel Robin, wat met 150 ha appels en 100 ha pere boer.
Ná sy broer, Lloyd, en sy pa, David, onderskeidelik in 2008 en 2009 oorlede is, het Robin en sy broer Wayne nege jaar lank saamgeboer, tot kanker Wayne in 2017 geëis het.
