Die plaaslike sitrusbedryf moet reeds bontstaan om planne te beraam vir stygende seevragkoste en insetkoste, asook boonop die dispuut oor die Europese Unie (EU) se nuwe regulasies vir die invoer van Suid-Afrikaanse lemoene.
Luidens die Suid-Afrikaanse Sitruskwekersvereniging (SKV) se nuutste nuusbrief sê mnr. Justin Chadwick, uitvoerende hoof van die SKV, dat dié prysstygings ’n impak op die hele voorsieningsketting se inset- en diensverskaffers sal hê aangesien hulle prysnemers is wat hul koste vooruitskat en dan die nodige marge byvoeg. Dit is die prys wat die verbruiker vir die produk moet betaal.
“Weens al die koste in die ketting wat met dubbelsyfers toeneem, word Sappi se aankondiging as opportunisties beskou. Die meeste bedrywe in die landbousektor het reeds aangedui dat hulle nie verdere prysstygings kan bekostig nie. Wanneer die produk nie meer winsgewend is nie, beraam die eienaars daarvan ’n plan. Hulle gebruik hul reserwes of gaan meer skuld aan, indien moontlik. Indien hulle nie kan nie, hou hulle op om te produseer.
“Die tyd het aangebreek vir belanghebbendes in die voorsieningketting om te herbesin oor hul siening van vanjaar en verder in die toekoms se winste, anders gaan hulle moontlik in die komende jare nie klante hê nie.”
Hy sê sitrusuitvoerders is tans in oorlewingsmodus en dat inset- en diensverskaffers hulle moet steun ten einde hul eie volhoubaarheid te verseker.
“Sappi was tot dusver ’n wonderlike vennoot van die sitrusbedryf. As die hoofborg van die sitrussimposium asook die toets van kartonhouers, het Sappi sy verbintenis tot en steun vir die sitrusbedryf bewys. Nou is die tyd om ons potlode skerp te maak en te verseker dat die situsbedryf aanhou om van krag tot krag te gaan.”
