Die Suid-Afrikaanse Tafeldruifbedryf (Sati) verbind homself tot volgehoue transformasie van die bedryf en vir die nakoming van Suid-Afrikaanse arbeidswetgewing. Die vooruitgang wat deur die tafeldruif- en vrugtebedryf gemaak is om onafhanklike etiese akkreditasie onder die volhoubaarheidsinisiatief van Suid-Afrika (Siza) se platform te verseker, word beskou as ’n grondige basis vir verdere ontwikkeling en volgehoue verbetering op dié gebied. Volgens onafhanklike oudits onder die Siza-proses, is die bedryf op die regte koers wat die verbetering van die lewensgehalte van sy werknemers betref.
Die bedryf het geakkrediteerde opleidingsmateriaal vir werknemers op alle vlakke ontwikkel om hul vaardighede te slyp. Produsente bied ook finansiële steun aan die verbetering van sorg in crèches vir kinders van plaaswerkers, die opknapping van gemeenskapsklinieke vir mense wat op of naby plase woon en geletterdheidsopleiding vir volwasse werkers en jeugdiges. Beurse word ook beskikbaar gestel om jong talent in die bedryf aan te moedig.
Opkomende boere
Sowat 11% van die 14 000 ha grond wat vir tafeldruifverbouing gebruik word, word deur opkomende boere bestuur. Produsente het deur ’n wingerdplantprogram die vervanging van onvanpaste kultivars en verouderde wingerdstokke op grondhervormings-plase ondersteun vir die aanplant van winsgewender kultivars wat die markte vereis. Dié program help ontluikende produsente om toegang tot markte te verkry wat andersins onbereikbaar sou wees.
Sati se raad tesame met die rade van streeksorganisasies, verwerp enige onregverdige arbeidspraktyke. Met die nuwe seisoen voor die deur, is enige optrede wat nie die belange van plaaswerkers op die hart dra nie, onwelkom in die bedryf – veral in ’n tyd wat die tafeldruifbedryf, sy boere en plaaswerkers na volhoubare harmonie in die werkplek streef.
