Dié verslag, wat vanoggend (6 September 2022) bekend gestel is, is die tiende een uit Atkin se pen.
Atkin is “verstom oor die merkwaardige vooruitgang” wat die Suid-Afrikaanse wynbedryf gemaak het sedert sy eerste verslag in 2013.
Hy het in Maart, Junie en Julie besoek gebring aan Suid-Afrika en ’n rekordgetal van 2 282 wyne deur 433 wynmakers geproe. Altesaam 8,5% (oftewel 195) hiervan het 95 punte of meer behaal.
SA tel onder bestes
“Suid-Afrika het bewys dat hy feitlik elke wynstyl goed kan maak, terwyl sy beste wyne onder die wêreld se elite tel,” het Atkin geloof in wat hy as sy “mees uitgebreide oorsig van een van die wêreld se opwindendste wynproduksiestreke” beskryf.
“My mening is dat baie min, indien enige, van die lande in die Nuwe Wêreld beter kan vaar.”
Atkin meen die 2017- en 2021-oesjare kan as twee van die Kaap se bestes tot nog toe beskou word. “Stellenbosch het sy posisie as die Kaap se voorste streek bevestig met sowat ’n derde van my wyne wat toptellings behaal het, wat van daar kom. Dit word gevolg deur die Swartland, maar daar is opwindende wyne in elke hoekie van die land, soos Malgas, Montagu en die Ceres-plato.”
Volgens hom was dit nie net Chenin blanc en Shiraz was vanjaar uitgestaan het nie (soos vorige jare), maar ook die Bordeaux-versnitte, Chardonnay en Pinot Noir.
99/100
In die verlede het Atkin groot opwinding ontketen as hy vir uitsonderlike wyne volpunte gegee het. Vanjaar kon Boekenhoutskloof Semillon en Sadie Family Columella die naaste hieraan kom met 99 punte (uit 100) elk. Tien ander wyne het 98 punte behaal.
Atkin is bemoedig deur die wynbedryf se toewyding om antwoorde op klimaatverandering te kry met nuwe wortelstokke, prieëlstelsels, grondbedekkings en bewerkingstegnieke. Hulle plaas ook groter klem op droogtebestande kultivars, soos Assyrtiko en Vermentino.
Op die podium
Savage, wat ’n kelder in Soutrivier in die hartjie van Kaapstad besit, maak agt wyne van druiwe wat hy reg oor die Wes-Kaap aankoop.
“Ek kan dit nog nie glo nie!” was sy reaksie toe Landbouweekblad hom oor die toekenning kontak.
“Hierdie is ’n enorme ding met baie geloofwaardigheid. Dit is waarskynlik die grootste ding wat ons nog reggekry het by Savage Wines. Dis werklik awesome!”
Volgens hom neem Atkin ’n wynmaker se loopbaangeskiedenis, en sy benadering tot wingerd en wyn in ag. Atkin neem dalk die besluit, maar gesels wyd met mense, wat beteken dis ook erkenning deur ’n wynmaker se portuurgroep, sê Savage.
“Tim se verslag is nie lig in die broek nie. Die eerste verslag was 80 bladsye lank en hierdie een is meer as 300 bladsye lank. Die feit dat hy so baie glo in Suid-Afrika en ons wyne is ongelooflik.”
Me. Charla Bosman van Sijnn is as die jongwynmaker van die jaar aangewys en mnr. Sheldon van Wyk, ’n wingerdkontrakteur wat veral met ou wingerde werk, is as wingerdboukundige van die jaar aangewys. Darling Cellars is die produsentekelder van die jaar.
