Nou kan ek myself ’n aartappelboer noem, sê mnr. Aldrin Lawrence van die Buyshoek-boerdery by Mara in Limpopo. Voordat hy vroeër vanjaar as Aartappels SA se opkomende produsent vir 2022 aangewys is, het Lawrence gedink hy is eintlik nog maar ’n amperse bestaansboer.
“Die mense hier in die omgewing sê met aartappels moet jy 30 ha per jaar onder aartappels hê om jouself ’n kommersiële boer te kan noem.” . Hy het wel 30 ha onder sy bestuur, maar met wisselbou plant hy tans net nagenoeg 14,4 ha aartappels onder spilpunte.
Hy het sy eerste spilpunt in 2017 gekoop en drie jaar gelede nog een aangeskaf. Vanjaar plant hy vir die eerste keer ook aartappels onder drupbesproeiing op die 2 ha waaruit sy pa, mnr. Gilbert Lawrence, sy lewe lank ’n bestaan gevoer het.
