Die produksie van vleis plaaslik en internasionaal sal vorentoe slegs met meer intensiewe boerderymetodes sodanig uitgebrei kan word dat boere in die groeiende vraag kan voorsien.
Prof. André Jooste, hoof- uitvoerende beampte van Aartappels SA, het op Breedplan, Landbouweekblad en die LRF se Vleisbeesskool gesê verbruik van rooivleis is op die korttermyn onder druk, maar gaan toeneem namate meer verbruikers se voorkeure en smaak verander.
Die aarde gaan teen 2050 nege miljard mense huisves en teen 2075 nagenoeg 9,5 miljard mense wat moet kos kry. Die bevolking groei reeds teen ’n allemintige 150 000 mense per dag. Teen daardie tyd sal 70% meer veilige, voedsame kos as tans nodig wees.
Intussen is veeboere onder druk, veral weens hoë insetkoste wat hul winsgewendheid raak. Boonop is daar goedkoper alternatiewe voedselsoorte beskikbaar. Namate die vraag styg, sal die prys wat die boer kry, egter ook opgaan. Pryse styg egter nog nie sodanig dat dit met inflasie tred hou nie. Dit benadeel winsgewendheid verder, want die pryse behoort minstens bokant inflasie toe te neem.
“Julle moet mense oorreed om meer vleis te eet. Te veel produsente gee net aandag aan produksie en steur hulle te min aan die verbruiker se voorkeure. Die gaping tussen die boer se prys en die prys wat die verbruiker vir sy vleis betaal, word ook groter, maar boere moenie met die handelaars daaroor baklei nie, want hulle is die mense wat die boer se produk moet bemark. Werk eerder met hulle saam,” het hy gesê.
