Die wintervakansie het nog altyd vir my jagtyd beteken. Ek was bevoorreg om op ’n plaas groot te word. Van kleins af was daar die wedywering om saam met Pa veld toe te gaan. Tans beleef ek die stryd tussen my seuntjie en dogtertjie, en besef dat ek net so geklink het, want wie sê die jagwêreld is net vir mans bedoel?
Langerlaas was ek oud genoeg en het “gekwalifiseer”. Dit was wonderlike tye in die jagveld. Bokkoors is iets wat ’n mens aan niemand kan oor- vertel voor jy dit nie self deurgemaak het nie. Pa het elke jagekspedisie baie interessant gemaak.
Elke aand is die jagstorie neergepen vir die nageslag en het ons die dag se opwinding weer oor ’n koppie stomende boeretroos beleef. Daar was ook tye dat ons vir kilometers op ’n bloedspoor moes loop. Soms weer die volgende dag. Die groot dankbaarheid wanneer so ’n bok gekry is, en ook die verligting.
