Wildboerdery Suid-Afrika (WRSA) het hom daartoe verbind om die Bloemfonteinse Dierebeskermingsvereniging (DBV) te ondersteun met sy ondersoek na 'n geval van beweerde wreedheid teenoor wilde diere op 'n wild-en-roofdierteelplaas in die distrik Verkeerdevlei in die Vrystaat. Die WRSA sê luidens 'n verklaring hy is “diep ontsteld” oor die verslae oor dié aangeleentheid wat hy tot dusver ontvang het.
In 'n verklaring sê die Bloemfonteinse DBV inspekteurs van die DBV in Bloemfontein en Virginia het saam met amptenare van die Vrystaatse departement van ekonomiese sake, kleinsakeontwikkeling, toerisme en omgewingsake op 31 Januarie gereageer het op 'n klag dat 'n luiperd na bewering in onmenslike omstandighede op die plaas gehuisves word.
Die inspekteurs en amptenare het op die plaas afgekom op 'n luiperdwyfie wat na bewering die afgelope vyf maande in 'n byna volledig toegemaakte sleepwa van 2 m x 1,5 m aangehou is. “Sy is in 'n donker sleepwa aangehou, is hoenders deur klein openinge gevoer en is omring deur haar eie urine en ontlasting, en die oorblyfsels van die hoenders. Die span het dadelik opgetree om die luiperd uit die sleepwa te bevry. Twee bakoorjakkalse en sewe dassies is dieselfde dag ook bevry,” lui die verklaring.
Volgens me. Reinet Meyer, hoofinspekteur van die Bloemfonteinse DBV, het hulle in die aanvanklike inspeksie talle ander wilde diere op die plaas opgemerk wat na bewering aangehou is in toestande wat strydig is met die Dierebeskermingswet (Wet 71 van 1962) en/of die Vrystaatse natuurbewaringsordonnansie.
Meyer sê dat die DBV eers aansienlike wetlike, logistieke, veeartsenykundige, finansiële en ander beplanning moes onderneem voordat die oorblywende wild op die plaas behandel, hervestig en behoorlik gehuisves kon word. Dié planne is op 22 Februarie in werking gestel.
Sy sê die plaaseienaar was nie op 31 Januarie met die inspeksie op die eiendom nie. Op 22 Februarie is 'n 55-jarige man in hegtenis geneem vir beweerde veelvuldige oortredings van die Dierebeskermingswet en/of die natuurbewaringsordonnansie.
“DBV-inspekteurs, veeartsenykundige personeel en wetstoepassingsbeamptes was geskok om te sien dat talle inheemse wilde katte en bakoorjakkalse in vuil hokke aangehou is en ’n magdom gesondheids- en welstandsprobleme ondervind. Die gespesialiseerde span kundiges het van vroegoggend tot laatnag gewerk om te verseker dat elke dier veilig gevang, verdoof en ondersoek is voordat dit in kratte neergelê is as eerste stap in hul reis na vryheid.”
Sowat 70 wilde diere is van die plaas verwyder. Die man wat in hegtenis geneem is, en die naam van die plaas is nog nie bekend gemaak nie.
In sy verklaring veroordeel die WRSA "ten sterkste" die beweerde optrede van die plaaseienaar. “Ons stel dit onomwonde dat hierdie behandeling van enige dier in stryd is met elke standaard van etiek en menslikheid wat ons verwag van alle mense wat die verantwoordelikheid aanvaar het om diere te versorg. As 'n vereniging is ons daartoe verbind om eties volhoubare wildboerderypraktyke te bevorder wat dierewelstand voorop stel. In die beste belang van die diere in ons sorg en ons bedryf, moet wildboere altyd die welstand van diere prioritiseer en voldoen aan die streng regulasies wat dierewelstand in Suid-Afrika reguleer.”
Dit sê verder dat die WRSA regstreeks na die Bloemfontein DBV uitgereik het om “ons volle ondersteuning en bystand in die ondersoek te bied op enige manier wat ons kan”. Die WRSA moedig lede van die publiek aan om gevalle van dieremishandeling of -wreedheid by die betrokke owerhede aan te meld.
Die Bloemfontein DBV bedank die DBV van Virginia, dr. Peter Caldwell van die Old Chapel-veeartsenykliniek in Pretoria, dr. Karin Lourens en haar span van die Johannesburgse natuurlewe- veeartsenykundige hospitaal en die vrag-en-meubelvervoeronderneming S&S vir hul hulp om die diere te hervestig.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
