’n Invoertarief van tot 45% om Australië se mark te beveilig, staar nie meer die Suid-Afrikaanse bedryf vir verwerkte vrugte- en tamatieprodukte in die gesig nie. Dié tarief, asook ’n kwota vir invoere, is verlede jaar deur SPC Ardmona vir invoere aangevra.
Die Australiese Kommissie vir Produktiwiteit het onlangs bevind dat die maatreëls wat aangevra en voorgestel is, nie regverdig was nie. Die aansoek het spesifiek op vrugte soos pere, appelkose en perskes gefokus. Luidens ’n berig op Business Day Live kan die uitvoer van die produkte en tamaties na Australië “ongehinderd” voortgaan.
Markaandeel, Austaliese dollar
SPC Ardmona het aangevoer dat versterking van die Australiaanse dollar invoere goedkoper maak, wat tot ’n aansienlike daling in die markaandeel van die Australiaanse mark lei. Dit maatskappy het verder gesê die hoeveelheid vrugte wat plaaslik deur die bedryf aangekoop is, het gedaal.
Die kommissie het in September verlede jaar ’n verslag wat spoedig saamgestel is, bekend gemaak. Hiervolgens het hulle bevind dat daar nie aan die standaarde van die Wêreldhandelsorganisasie (WHO) vir sulke tariewe voldoen word nie.
Volgens die volledige verslag skryf die kommissie die afwaartse kurwe wat die bedryf beleef, toe aan ’n afname in die land se vraag na verwerkte vrugte, stygende plaaslike produksiekostes en dalende uitvoervolumes.
Australië se teenstortingskommissie het verlede maand ook ’n ondersoek na beweerde storting deur die Suid-Afrikaanse bedryf vir verwerkte perskes laat vaar. Die saak is verlede jaar Julie deur SPC Ardmona aangevra.
Bron: BDLive.
