Lidmaatskap aan ’n brandbestrydingsvereniging kos ’n paar honderd rand per jaar en bied meer as toegang tot nodige dienste, sê die Groter Cederberg Brandbeskermingsvereniging (GCBBV).
In geval van ’n brand berus die bewys van nie-nalatigheid by die betrokke persoon wat nie lid van ’n brandbestrydingsvereniging is nie. ’n Lid van ’n brandbestrydingsvereniging is outomaties nie nalatig nie en indien daar wel ’n eis ontstaan moet die eiser nalatigheid by die lid bewys.
Die GCBBV help lede met die toepassing van die Brandwet asook met brandbane op eiendomsgrense, vermindering van hoë brandstofladings, toepassing van minimumriglyne, opgeleide personeel met die nodige beskermde oorklere en voldoende brandbestrydingstoerusting.
Volgens die vereniging is daar aanduidings dat klimaatsverandering kan lei tot ’n langer brandseisoen met hoër temperature en droër winters. “Dus kan ons aanvaar dat brande ook meer gereeld gaan voorkom. Die huidige brandseisoen word beskou aas een van die ergstes in baie jare,” sê die organisasie. Vanaf 1 November 2014 het die GCBBV reeds met 16 brande gehelp.
Die vereniging se dienste sluit ook die volgende in:
- Die bestuur van twee Working on Fire (WoF) spanne wat vir lede beskikbaar is vir die maak van brandbane en ander brandstofverminderingsaksies soos die skoonmaak om geboue, boorde en landerye en uitvoer van beheerde brande;
- Verskeie bewusmakingaksies ten einde brande te verminder en te voorkom;
- Die koördinering en aanbied van opleidingsessies gemik op grondeienaars en hul personeel;
- Die koördinering van brandbestuurseenhede ten einde te verseker dat lede vinnig en doeltreffend optree wanneer brande wel ontstaan;
- Die voorsiening aan lede van die Vuurgevaarindeks (FDI) ten einde lede aan te moedig om meer sensitief in hul bestuur te wees ten einde brande te voorkom;
- Die bied van spanne wat help tydens bestrydingsoperasies;
- Die opstel van brandbestuursplanne ten einde riglyne vir lede daar te stel om hul eiendomme beter te bestuur en risiko’s te verminder;
Lidmaatskap by brandverenigings word deur Agri SA en versekeringsinstansies ondersteun.
Kontak die Groter Cederberg Brandbeskermingsvereniging gedurende kantoorure by 022 931 2083, of besoek hul webwerf by www.cederbergfpa.co.za.
