Een van die super-seiljagte wat nou in die Volvo-wedvaart om die wêreld meeding, het ’n boer aan boord: Om alles wat breek, te herstel, of te sorg dat dit nie breek nie!
In die Volvo-wêreldvaart vir seiljagte wat pas uit Kaapstad geseil het op die tweede been van dié moordende wedvaart, is ’n voormalige boer een van die belangrikste bemanningslede op die seiljag Team Brunel.
Jens Dolmer is die bootskaptein op dié seiljag – en is nie mis te kyk nie. Hy is 1,98 meter lank, maar wat boonop opmerklik is, is sy groot hande, sê Robbert-Jan Metselaar, skakelbestuurder van die Team Brunel-span.
Dolmer is ’n boorling van Denemarke – hy het jare lank op ’n plaas in Denemarke gewerk. Voordat hy die boerdery vaarwel toegeroep het, was hy ’n melkboer. In sy beroep as boer het hy natuurlik (soos enige boer) geleer om enigiets wat stukkend is, te herstel, en dit is dié vaardigheid wat hom so belangrik maak vir sy rol as bootskaptein.
“As bootskaptein is dit my plig om te sorg dat álle toestelle op die seiljag werk. Alles. Die ervaring wat ek opgedoen het toe ek geboer het, kom baie nuttig te pas op die seiljag. Ek het op die plaas die tegniese vaardighede geleer wat ek nou op die seiljag gebruik.”
Dolmer het die boerdery vaarwel toegeroep nadat hy ernstig beseer is toe hy deur swaar masjinerie teen ’n muur vasgedruk is. Hy het hy die plaas daarna verkoop, ’n kursus in seiljag en ski gevolg en daarna in Frankryk in dié sporte klasgegee. Dit is waar hy met die Volvo-wedvaart kennis gemaak het en dié seil-gogga hom gebyt het. Hy het die Volvo-wedvaart van 2008/’09 as bootskaptein van Ericsson 3 meegemaak.
Dolmer is getroud en die pa van ‘n dogter. Hy sê sodra sy gesin sou aandui dat hulle genoeg gehad van sy afwesigheid van die huis af, sal hy ophou. Hy is tot 200 dae van die huis af. Maar hulle ondersteun hom.
Dus, alles wat op die seiljag breek of wil breek, is Dolmer se kos. Sy werk is fyn uitgewerk en hy is gereeld in kontak met die ondersteuningspan op land. Op windstil dae gaan hy alle toersuting, soos die wenasse en die stuurmeganisme na. Hy kommunikeer met die span op land sodat hulle by die volgende hawe nuwe toerusting kan gereed hê, indien nodig.
* Die sewe seiljagte wat in die Volvo-wedvaart deelneem, het Woensdag, 19 November, uit die V&A Waterfront in Kaapstad weggespring op die tweede been van dié oseaan-wedvaart van sowat 6?125?seemyl na Abu Dhabi. Die spanne seil altesaam 39?000 seemyl (72 228 km) in nege skofte om die wêreld.
Foto: Die seiljag, Team Brunel. Die jag is 20,37 m lank en het 'n bemanning van 10. Die mas is 30 m hoog. Foto: Team Brunel
