Sedert Fiat se plaaslike bekendstelling van sy Panda-reeks in 2013 het hierdie buksie-stoftrappers in menige Suid-Afrikaner se hart ingekruip. En nou word dié, kom ons noem dit maar stadsportnutsreeks, aangevul met 'n Cross-grondpadryer asook 'n volwaardige 4X4-weergawe.
Met die ontwerp van die Panda het dit van meet af aan gegaan oor die kombinasie van eenvoud en doeltreffendheid. Die kompakte buite-afmetings en die slim gebruik van die binneruim was klaarblyklik presies wat talle intreevlakvoertuigkopers gesoek het.
Opgekikkerde model
Fiat het nie getorring aan die Panda se afmetings nie en die reeks eerder opgekikker met 'n vars voorkoms en twee nuwe kleure wat hulle Amore Red en Colosseo Grey noem. Die nuwe intreevlakmodelle met die Easy- en Lounge-afwerking het 15 duim staalwielvellings (met wieldoppe) terwyl die Cross- en die 4X4-weergawes met allooiwielvellings van 15 duim spog.
Die binneruim is opgekikker met vars ontwerpelemente, heelwat nuwe opwindende materiale en praktiese bêreplekke vir snuisterye. Danksy die modulêre ontwerp is verskillende bagasieruimte- en sitplekkonfigurasies moontlik. Die bagasieruimte van 225l kan maklik tot 870l vergroot word deur slegs die agterste stiplekrugleuning plat te vou. Die vyf deure maak lekker wyd oop.
Die Easy-weergawe het 'n radio en lugversorging as standaardtoerusting. Die Lounge, Cross en 4X4 spog met die nuwe UconnectTM-stelsel met Bluetooth 2.1, klankherleiding, 'n USB-sok in die paneelkissie, nóg 'n USB-herlaaisok in die voorpaneel én stemherkenning.
Kragtig
Die Panda se 900 kubieke sentimeter tweesilinder-petrolenjin lewer 63 kW drywing teen 5 000 r/min en 145 Nm se wringkrag teen 1 900 r/min. 'n Vyfgang-handratkas doen die skakelwerk vir al die 4X2-weergawes wat voorwielaangedrewe is. Die Cross en die 4X4 het 'n sesgang-handratkas. Terloops, die Cross spog met effe méér krag, naamlik 66 kW teenoor die res van die reeks se 63 kW!
Die 4X4 het 'n aangepaste veerstelsel en 'n baie lae eerste ratverhouding wat help dat die 175/65T15-buitebande behoorlik vastrap wanneer dit nodig raak. Die Cross-weergawe is nie bloot die standaard Panda met die voorkoms van 'n stoftrapper nie, want dit beskik oor behoorlike onderstelbeskerming én 'n elektroniese ewenaartsper.
Die nuwe Panda-reeks, veral die Cross en die 4X4, is miskien net die regte ryding vir die kinders wat in die stad leer of werk en naweke daardie grondpaaie plaas toe aandurf!
