By Baden Ligte Staalprojekte voeg mnr. Sas de Kock van Caledon ’n natuurlike aanvoeling vir ontwerp saam met die praktiese kennis van skaapboerdery en soliede sweiswerk om hekkies, hokkies, diptoerusting en skale te maak wat die rugbreek uit skaaphantering haal.
“Met die toerusting wat ons vervaardig, poog ons om vir die boer ’n mate van arbeidsbesparing teweeg te bring,” sê De Kock, wat die staalwerke op sy plaas Baden bedryf.
Hy probeer om, waar moontlik, toerusting te maak wat maklik hanteerbaar en verskuifbaar is deur dit so te ontwerp dat dit op wiele gemonteer kan word, of op ’n bakkie gelaai kan word.
Hy het ’n paar jaar gelede besluit om op sy wolskaapvertakking te konsentreer en sy saaigrond te verhuur. Toe het hy begin om sy skaapboerdery so in te rig dat hy en die werkers die werk so maklik moontlik kon doen én die boerdery se produktiwiteit verhoog.
Hoewel hy aanvanklik basiese toerusting gebruik het, het hy mettertyd pyp- en plaatbuigmasjiene aangekoop. Hy het ook nog ’n sweiser, mnr. Kosie Roux, aangestel.
Hy maak ook ’n skaapklamp wat dit maklik maak om skape te hanteer wanneer hulle gedoseer, ingeënt, gemerk word, hul kloue ondersoek word of hulle gemikskeer word. Hy het hekke vir verskillende gebruike begin maak en in 2013 die skaal wat hy gemaak het, by die Agri Megaweek op Bredasdorp vertoon. Dit is gevolg deur opstapelbare en verskuifbare voerbakke.
En toe Overbergse wolboere intensiewer lammetodes begin toepas, het hy lam- en skeerhokkies en voerkrale begin maak en installeer.
De Kock sê hy het gou besef as hy enige van die skaapboerdery of staalwerke behoorlik wil doen, sou hy moes kies. Hy het sy skaapboerdery ook uitverhuur en konsentreer nou op die staalwerk.
* Lees die volledige artikel in Landbouweekblad van 15 Januarie 2016.
*Kyk na twee video’s van De Kock se toerusting:
