‘n Beraad is in Kaapstad gehou waar na moontlike samewerkingsooreenkomste gekyk is wat die landbou, vervaardiging, energie en ander sektore insluit.
Dié voorstel kom in die lig van veral met die vraag van voedsel wat in lande suid van die Sahara teen ’n jaarlikse koers van 3% gaan groei en die landbousakesektor wat potensieël 1 000 miljard Amerikaanse dollar teen 2030 werd sal wees.
Boonop word voorspel dat die streek se vraag na energie teen 2040 met 107% sal styg, met ‘n belegging van meer as 50 miljard Amerikaanse dollar per jaar.
Mnr. Paolo Borzatta, senior vennoot by The European House Ambrosetti, het gesê die potensiële groei in die volgende 15 jaar vir besproeiing- en watervoorsiening en sanitasie is onderskeidelik vier en 22 miljard Amerikaanse dollar per jaar in sub-Sahara-Afrika.
Met nagenoeg 65% van die bevolking wat in die landbou werksaam is, word geglo dat verhoogde produktiwiteit ’n direkte drywer vir die skepping van nuwe werksgeleenthede is.
Verder beslaan lande suid van die Sahara meer as 200 miljoen hektaar onbewerkte grond en sowat 45% van dié grond is minder as ses uur van plaaslike verbruikersmarkte af geleë.
Borzatta het gesê Italië het mediumskaalse boere wat hierheen kan kom om hulle kennis te deel, so ook kan universiteite tussen die twee lande hulle kennis oor onder meer sade en kunsmis deel.
Een van die operasionele gereedskappe wat voorgestel word om verdere venootskappe vir groei in die sektor te smee, is om ‘n aanvoerketting-benadering aan te neem deur ‘n geïntegreerde agro-industriëlepark model (AIP) te volg.
Van die konsepte sluit in uitsette op ‘n kommersiële basis wat by veeteelt of visboerderye geïntegreer kan word, aanvanklike industriële verwerking, wat insluit die verwerking van die uitsette van ‘n individuele boer of die van ander kleinskaalse boere in die gebied, vir die plaaslike markte of vir uitvoer. Asook opleiding en navorsing, insuitend die oordrag van vaardighede en tegnologie langs die verskillende fases van die waardeketting.
Die AIP-model wat reeds met sukses in ander ontluikende gebiede soos Indië en suid-oos Asië in werking gestel is, kan aangepas word en in die lande suid van die Sahara, soos Zambië, Uganda, Tanzanië, Ethiopië en die Kongo toegepas te word, meen The European House Ambrosetti.
