Brasilië se vorige president, Dilma Rousseff, is op 31 Augustus 2016 as president verwyder nadat die senaat bevind het dat sy wette rondom die begroting oortree het.
Haar opvolger was Michel Temer, Rousseff se visie-president. Op Donderdag 18 Mei 2017 het die Brasiliaanse hooggeregshof ingestem dat Temer ondersoek word vir moontlike korrupsie. Hy het na bewering die skuif van fondse vir indirekte persoonlike gewin goedgekeur. Meer spesifiek, daar word beweer dat Temer toestemming verleen het dat betalings gedoen word aan Euardo Cunha, die vorige speaker van die huis. Hierdie betaling sou gedoen gewees het om Cunha, wat tans in die tronk is, se stilswye te koop. Hy is ‘n ooggetuie in die sogenaamde “karwas”-hofsaak, waarin maatskappye geld betaal het vir staatskontrakte.
Dié nuus het die Brasiliaans Bovespa-aandele indeks met meer as 10% laat daal.
‘n Ander manier na om na die situasie te kyk, is “Credit default swaps (CDS)”. CDS bied versekering teen staatskuld. ‘n Land se staatskuld word vergelyk met dié van die VSA, en die gevolglike verskil of premie (“spread”) dui die mate van risiko vir die gegewe geldeenheid aan. Die onderstaande grafiek illustreer hoe hierdie premie opgeskiet het op Donderdag 18 Mei 2017.
Dis in die bostaande grafiek duidelik dat meeste ander ontluikende markte se CDS-premies ook toegeneem het. Die grootte van die verswakkings was egter minder as in Brasilië se geval, en die premies van Indië en Pole het selfs onveranderd gebly.
Wanneer na Suid Arika se aandelemark gekyk word, kan gesien word dat die Top 40-indeks nie eers negatief gesluit het op Donderdag 18 Mei 2017 nie.
Die rand het egter intradag verswak tot R13,58 teenoor die Amerikaanse dollar op Donderdag 18 Mei 2017, maar het versterk tot R13,29 op Vrydag 19 Mei 2017.
Dit wil dus lyk asof beleggers die situasie in Brasilië as redelik geïsoleerd beskou, al is daar tog ‘n effense deelname deur ander ontluikende markte.
Dit is interessant om die volgende observasie te maak: Brasilië is, net soos Suid-Afrika, ‘n ontluikende land met ‘n ekonomie wat sterk leun op die uitvoer van kommoditeite. Nadat die Chinese ekonomiese groeikoers begin afplat het ná 2011, het kommoditeitspryse onder druk begin kom.
Die voordeel uit kommoditeite wat Brasilië en Suid-Afrika voorheen geniet het, het dus begin minder word, en beide lande se ekonomieë het onder druk begin kom. ‘n Mens word herinner aan die Engelse gesegde “A rising tide raises all ships”.
Toe kommoditeitspryse hoog was, het Brasilië en Suid-Afrika se ekonomieë goed gelyk. Noudat die gety begin uitvloei, word die regerings se karakters getoets.
* Edwin Smit is ‘n portefeulje bestuurder by BVG Financial Solutions, ‘n Gemagtigde Finansiële Diensteverskaffer van die FSB, met lisensienommer FSP 39889, en ook ‘n geregistreerde JSE finansiële handelaar van BVG Commodities (Lid van die JSE). Hy is ‘n gereelde spreker op RSG. Sy kontakbesonderhede is: (012) 484-4013 of edwin.smit@bvg.net. Die volgende dienste word gebied:
Wisselkoersverskansing op BVG se Yield-X (JSE) lisensie. Lesers kan inteken op die daaglikse valutaverslag.
Die ruil van fisiese kontant in samewerking met Absa en Investec: Omskakeling van rande na dollars, euros en ponde, en vice versa. Fondse word direk in kliënte se Absa of Investec-bankrekening betaal: BVG Financial Solutions neem dus self nie die fondse in ontvangs nie.
Aandele portefeuljebestuur in samewerking met Momentum SP Reid Securities. Lesers kan inteken op die daaglikse aandele-verslae.
