Die volgende ses maande gaan moeilik wees, sê Pick n Pay se hoof uitvoerende beampte, mnr. Nick Badminton. Hy het in sy verslag oor dié kleinhandelaar se finansiële resultate vir die ses maande tot einde Augustus gesê hy voorsien steeds geleenthede.
Een van die grootste invloede op die maatskappy se verdienstegroei in dié tydperk is Eskom se elektrisiteitsprysverhogings. “Elektrisiteitskoste is die hoogtes in en dit lyk of daar nog verhogings aan die kom is. Dié koste het noemenswaardig van 3,1% van uitgawes in die ses maande tot Augustis verlede jaar tot 3,8% van koste in dieselfde tydperk vanjaar gestyg. Die uitwerking van Eskom se verhogings sal na verwagting ’n toename van 40 % in ons elektrisiteisrekening vir die jaar beteken, met meer om te kom in die volgende paar jaar,” sê hy.
Die groep se omset het met 12,3% tot R26,6 miljard gestyg vergeleke met dieselfde tydperk verlede jaar, lui ’n berig van Fin24.com. Badminton het ook gesê sy maatskappy sal voorgaan om sy samewerking te gee in die Mededingingskommissie se ondersoek na onmededingende gedrag deur supermarkte.
Planne vir die 2011-boekjaar sluit die uitbreiding en verbetering van winkels teen R1 miljard in. Pick n Pay wil ook in Afrika uitbrei. Hy doen tans sake in Namibië, Botswana, Swaziland en Zimbabwe deur sy aandeelhouding in Meikles. Angola, Mosambiek, Lesotho en Zambië is volgende op die lys
Bron:
22 Oktober 2009
