Toyota tooi sy immergroen beste verkoper hier en daar met onder meer subtiele glansswartafwerking en stel die Raider Black bekend.
Toyota is ’n ou kalant waar dit kom by spesiale modelle - dis nou daardie wat makliker raakgesien word tussen die meer gewone weergawes in die koöperasie se parkeerterrein. Dink gerus terug aan die Dakar, die Legend 35, -40 en -45 en die Heritage.
Dit is slegs die Hilux-vlagskipmodel 2.8 GD-6 Raider-dubbelkajuit met die kleure Glacier White, Chromium Silver en Graphite Grey, wat as basis vir die nuwe Raider Black dien. Die Raider Black se opvallendste onderskeidende elemente is die glansswartafwerking vir die sierrooster, dele van die voorbuffer en die dak.
Die wielbooguitbousels, deurhandvatsels en buite-truspieëls het dieselfde kleurafwerking as die bakwerk. Die nuwe 18 duim-allooiwielvellings het ’n driespeekontwerp en ’n swart rolstaaf en bakseiltjie rond die prentjie buite af.
Binne-in die kajuit het die swart leerafwerking nou netjiese sigbare silwer naaldwerk. Die bestuurder se sitplek is elektries verstelbaar en ’n klompie koolstofveselpanele verhoog die kontras. Die res van die geriefskenmerke asook die aktiewe en passiewe veiligheidseienskappe is maar eie aan die Raider se standaardtoerusting.
Dit is dalk net ook belangrik om weer vinnig na die enjin se werkverrigting te kyk: die GD-inlynviersilinder-dieselenjin verplaas 2 755 kubieke sentimeter en lewer 130 kW drywing en 420 Nm se wringkrag wat vanaf 1 600 tot 2 400 r/min beskikbaar is.
Kopers kan kies tussen ’n sesgang-handratkas of ’n sesgang outotmatiese ratkas. Terloops, vir die weergawe met die outomatiese ratkas is daar ’n wringkragstuwing van tot 250 Nm tussen 1 600 en 2 400 r/min beskikbaar! Die pryse van die nuwe Hilux Raider Black strek van R521 100 tot R604 300 (BTW ingesluit).
