Op die oog af lyk die nuwe CR-V nie meer waffers anders as sy voorganger nie maar tog is die asafstand effe verleng en daarby baat die binne-afmetings en geriefsvlakke uiteraard verbeter.
Honda het al meer as nege miljoen CR-V’s in 150 lande wêreldwyd verkoop en die vorige geslag is nie om dowe neute as die wêreld se beste sportnutsvoertuig-verkoper bekroon nie. En, sê Honda, hierdie nuwe vyfde geslag bou voort op dié trotse tradisie...
Die binneruim met sy digitale instrumente en raakskerm is so modern as wat kan kom. Honda voer die aktiewe en passiewe veiligheidseienskappe van die CR-V met hierdie nuweling nóg 'n stappie verder.
Behalwe vir veiligheidseienskappe soos onder meer die baanverlaatgonser spog die nuweling nou ook met 'n selfstopfunksie wat teen stadsnelhede voorkom dat die voertuig teen 'n voetganger of 'n ander voertuig sal bots.
LEES OOK: Fiat verras met viertrek-stoftrapper
Vuurkrag
Wat aandrywing betref, is daar twee enjins beskikbaar, naamlik 'n turbo-aangejaagde 1.5 liter (140kW/240Nm) en 'n normaal-geaspireerde 2.0 liter (113kW/189Nm). Albei lewer drywing primêr aan die voorwiele deur 'n CVT-palwissel outomatiese ratkas. Vir die viertrekmodelle word die krag eenvoudig vir beter vastrap dan ook na die agterwiele verplaas.
Die nuwe CR-V is 'n beskaafde en gesofistikeerde stoftrapper met pryse wat strek van R422 900 vir die CR-V 2.0 Comfort tot die CR-V 1.5T Exclusive se R626 900 (BTW ingesluit).
Dit sluit 'n 5 jaar/200 000 km waarborg en 'n diensplan vir 5 jaar/90 000 km in. Honda bied ook 'n AA-gerugsteunde padbystandsdiens vir 3 jaar. Die diensintervalle is 15 000 km vir die 2.0 liter terwyl die 1.5 liter turbo-weergawes elke 10 000 km versien moet word.
