Die Peugeot 3008-sportnutsvoertuig (SNV) gaan beslis sy skouers breed maak in die plaaslike C-segment vir SNV’e. Terwyl voertuigverkope oor die algemeen harde bene kou, groei die SNV-aanbod byna daagliks en die 3008 is die jongste toevoeging.
Dit is ook die heel eerste model wat met dié Franse vervaardiger se sogenaamde i-Cockpit spog. Die nuweling bied méér binneruimte ondanks sy kompakte buite-afmetings, klasleier-tegnologie èn die voorste veiligheidskenmerke - alles netjies verpak in ’n ligter en meer beweeglike voertuig met boonop nog beter brandstofekonomie as ’n bonus.
Dié voertuig se bestuurderservaring weerspieël volgens Peugeot die goed gebalanseerde verhoudings van die bakwerkontwerp. Met die doeltreffende enjins en hoë vlak van tegniese toerusting gaan die 3008 beslis die ander rolspelers in die C-segment (SNV) laat wakker lê. Die bakwerklengte van 4,45m maak die 3008 ’n mediumgrootte SNV.
Meer ruimte, maar ligter
Die jongste weergawe het ’n langer asafstand as sy voorganger wat méér binneruimte èn groter kajuitgerief beteken. Die bagasieruimte (onder die deksel) hou 520l wat 90l méér is as in die geval van die vorige model. Met die bagsiedeksel uit die pad uit en die agterste sitplekke platgeslaan, is daar ’n baie bruikbare 1 670l pakplek wat wag. Maar, die beste nuus is dat ongeag die talle verbeteringe met ’n groter binne- èn bagasieruimte weeg die nuweling in teen ’n volle 100kg minder as die vorige model… dus heeltemal gevegsfiks!
Die 3008 word aangedryf deur brandstofdoeltreffende Euro5 petrol- en dieselenjins. Die 1.6l THP lewer drywing van 120kW deur ’n S&S 6-gang outomatiese ratkas (EAT6). Die dieselweergawe, die 2.0l HDi, lewer drywing van 110kW en sal met dieselfde outomatiese ratkas toegerus wees wanneer dit vroeg in 2018 in Suid-Afrika aankom.
Peugeot sien sy nuwe 3008 as ’n volwaardige viertrekvastrapper danksy die “Advanced Grip Control” wat deur ’n draaiknop op die middelkonsole ingeskakel kan word. Daar is altesame vyf verskillende vastrapverstellings, naamlik vir normale gebruik, sneeu, modder, sand èn dan vir die ESP afgeskakel (ESP = elektroniese stabiliteitsprogram).
Die 3008 het ’n ellelange lys van geriefs- en veiligheidseienskappe. Die (huidige) reeks se pryse strek van R399 900 tot R569 900. Dit sluit in ’n drie jaar- of 100 000 km-waarborg, ’n vier jaar- of 60 000 km-diensplan, ’n padbystandsdiens van drie jaar of 100 000 km en teenroeswaarborg vir 12 jaar.
